АНУ-ын төрийн нарийн бичгийн дарга Блинкен Финлянд улс НАТО-д элссэнийг "түүхэн өдөр" гэж нэрлээд, энэ нь Владимир Путины Украйнд эхлүүлсэн дайнтай холбоотой гэв.
Блинкен "Энэ бол ноён Путинд талархаж чадах цорын ганц зүйл гэж би хэлмээр байна. Учир нь тэр Оросын түрэмгийллээс урьдчилан сэргийлэхийг бидэнд дахин дахин сануулж буй явдал" гэж Блинкен хэлэв.
НАТО-гийн Ерөнхий нарийн бичгийн дарга Йенс Столтенберг сэтгүүлчдэд хэлэхдээ "Энэ явдал Финляндыг аюулгүй, НАТО-г илүү хүчирхэг болгоно" гээд Ерөнхийлөгч Путины Украинд довтолгооны зорилго нь НАТО-г зүүн зүг тэлэхгүй байх, эвслийг шинэ улс гишүүн орноор нэмэгдүүлэхгүй байх явдал байсан. Гэвч түүний энэ зорилго эдүгээ яг эсрэгээрээ болж байна" гэжээ.
Финляндын Ерөнхийлөгч Саули Ниинистё мэдэгдэлдээ "Шведийн гишүүнчлэлгүйгээр Финляндын гишүүнчлэл бүрэн байх боломжгүй. Шведийг НАТО-д эрт элсүүлэх ажил тасралтгүй үргэлжилж байна” гэж дурджээ.
Энэ бүхэнтэй зэрэгцэн Кремлийн хэвлэлийн төлөөлөгч Дмитрий Песков "Финлянд улс НАТО-д элссэн нь Оросын аюулгүй байдал, үндэсний эрх ашигт халдсан хэрэг" гэж мэдэгдэв.
Тэрбээр "Энэ бол нөхцөл байдлыг улам хурцатгаж байна гэж Кремль үзэж байна. НАТО-г өргөжүүлэх нь манай аюулгүй байдал, ОХУ-ын үндэсний ашиг сонирхолд халдаж буй хэрэг гэж бид үзэж байна. Мэдээжийн хэрэг, энэ нь биднийг тактикийн болон стратегийн хувьд аюулгүй байдлаа хангахын тулд сөрөг арга хэмжээ авахад хүргэж байна" гэж хэлэв.
Финлянд улс төвийг сахих байдлаа орхиж, НАТО-д элсэхээр шийджээ. Швед улс ч мөн НАТО-д элсэх өргөдлөө өгснөөр төвийг сахих 200 гаруй жилийн урт хугацааны тогтсон дэг жаягаасаа татгалзав.
Юу өөрчлөгдөх вэ?
ОХУ-ыын хувьд практик утгаараа тийм ч их өөрчлөлт гарахгүй. Финлянд улс 1994 онд НАТО-гийн албан ёсны түнш болсон, эвслийн армитай нягт хамтран ажиллаж байгаа.
Гол өөрчлөлт нь Хойд Атлантын гэрээний тавдугаар зүйл бөгөөд НАТО-гийн гишүүн аль нэг улс руу халдсан тохиолдолд бүхэл бүтэн холбоонд халдсан гэж үздэг.
"Ерөнхийлөгч Путины хамгийн чухал зорилго нь НАТО-г цаашид өргөжүүлэхийн эсрэг байгаа. Тэр НАТО-г цомхотгохыг хүссэн ч одоо өөрийн хил дээр НАТО-г жинхэнэ утгаараа авчирлаа" гэж Йенс Столтенбер хэлжээ.
Тодотгоход, Финлянд, Оросын хуурай газрын хил нь 1300 гаруй км урт юм. Түүгээр ч барахгүй Оросын тив хоорондын баллистик пуужингийн стратегийн болон Хойд флотын баазууд Финляндтай хиллэдэг бүс нутагт төвлөрдөг байна.
Эх сурвалж: Сentralasia media