Дайчилгааны хоёр дахь давалгааг Орост явуулахаар төлөвлөөгүй гэж Оросын жанжин штабаас мэдэгдэв.
"Жанжин штабын төлөвлөгөөнд хоёр дахь удаагаа дайчилгаа зарлах асуудал байхгүй гэдгийг та бүхэнд батлан хэлмээр байна" гэж Жанжин штабын зохион байгуулалт, дайчилгааны ерөнхий газрын хэвлэлийн төлөөлөгч Владимир Цимлянский хаврын цэрэг татлагын талаар баасан гарагт мэдээлэл хийх үеэр мэдэгдэв.
“Цэргийн жинхэнэ албанд татагдсан хүмүүс, мөн сайн дураараа энэ ажиллагаанд оролцох хүсэлтээ илэрхийлж буй иргэд тусгай ажиллагааны зорилгоо хэрэгжүүлэхэд хангалттай байна” гэж тэрбээр хэллээ.
Оросын эрх баригчид Украины тусгай ажиллагаанд зориулж дахин дайчилгаа хийх төлөвлөгөөг үгүйсгэж байгаа ч гэсэн сайн дурынхан болон гэрээт албан хаагчдыг элсүүлэх кампанит ажил эрчимжиж байна. "Bloomberg" гуравдугаар сард ОХУ дахин 400,000 хүртэл хүнийг цэрэгт элсүүлэхээр төлөвлөж байна гэж мэдээлж байсан юм. Пүрэв гарагийн өглөө мөн ийм тоог Британийн цэргийн тагнуулын урьдчилсан мэдээнд дурджээ.
Тагнуулын тайланд дурдсанаар Орос улс энэхүү кампанит ажлыг дайчлах ажиллагаа биш харин сайн дурынхныг элсүүлэх гэж танилцуулж байгаа ч бодит байдал дээр энэ ялгаа бүдгэрэх боломж бий.
Оросын эрх баригчид цэрэг армийн хүчний хомсдолыг нөхөхийн тулд дотоодын эсэргүүцлийг багасгахын тулд "сайн дурын схем"-ийг сонгосон байж магадгүй юм. Ийм кампанит ажил нь хүссэн 400,000 сайн дурынхныг татах магадлал тун бага гэж Британийн тагнуулын албаныхан үзэж байгаа тухай бид урьд нь мэдээлж байв.
Эх сурвалж: ВВС