ОХУ-ын ерөнхийлөгч Владимир Путиний автомашиныг үйлдвэрлэдэг төрийн өмчит компани Санкт-Петербург хот дахь Тоёотагийн үйлдвэрийг шилжүүлж авахаар болсныг Оросын худалдаа, аж үйлдвэрийн яам өчигдөр зарлажээ.
Тус яамны харьяа Автомашин, Автомотив Хөдөлгүүрийн Судалгаа Шинжилгээний Төв Хүрээлэн (НАМИ) компани Тоёотагийн хуучин үйлдвэрийг өмчдөө шилжүүлж авахаар болсон байна.
НАМИ нь тансаг ангиллын Aurus лимузиний үйлдвэрлэгч юм. Уг автомашиныг Путин 2018 онд ерөнхийлөгчийн тангараг өргөхдөө хөлөглөж байв.
Өчигдөр Японы Тоёота компани үйлдвэрээ Оросын төрийн өмчит компанид шилжүүлснийг бас баталжээ.
Гэхдээ ямар нөхцөлөөр шилжүүлсэн тухай талуудын аль аль нь мэдээлэл өгөөгүй юм.
Тоёота компани Украины дайнтай холбоотой олон улсын хориг арга хэмжээний улмаас үйлдвэрлэл явуулах боломжгүй болсон үндэслэлээр өнгөрсөн оны есдүгээр сард Орос дахь ажиллагаагаа зогсоож буйг зарлаж байв.
НАМИ өмнө нь бас Renault, Nissan компаниуд Оросын зах зээлээс гарсны дараа үйлдвэрийг нь шилжүүлэн авч байжээ.
Оросын худалдаа, аж үйлдвэрийн яам Санкт-Петербург дахь үйлдвэрийг удахгүй ажиллуулж эхлэхээ амласан байна. Гэхдээ Украины дайнтай холбоотой хориг арга хэмжээний улмаас Оросын автомашин үйлдвэрлэлийн салбар хангамжийн томоохон асуудалтай тулгараад байгаа юм.
Эх сурвалж: InterFAX
