Италийн мэдээллийн аюулгүй байдлын газар өчигдөр ChatGPT чатбот системийг түр хугацаанд хориглож, тус улсын холбогдох хуулийг зөрчсөн эсэхийг шалгаж эхэлжээ.
Тухайлбал хэрэглэгчдийн насны хязгаар 13 ба түүнээс дээш байх хуулийн заалтыг зөрчиж, хэрэглэгчдийн хувийн мэдээллийг цуглуулсан байж болзошгүй гэж сэжиглэж байгаа юм байна.
ChatGPT системийг хөгжүүлэгч OpenAI компани шийдвэр гарснаас хойш 20 хоногийн дотор үйлчилгээгээ Италийн зах зээлд зогсоох ёстой ба ингээгүй тохиолдолд дэлхийн зах зээлээс олсон нийт орлогынхоо 4 хувьтай тэнцэх торгуулиар шийтгүүлэх юм.
Ингэснээр Итали нь өрнөдийн орнуудаас ChatGPT системийг хориглосон анхны улс болж байна.
Одоогоор Хятад, Хонконг, Иран, ОХУ болон Африкийн зарим орнуудын иргэд энэ системийн хэрэглэгч болох боломжгүй байгаа юм.
Өнгөрсөн оны сүүлээр зах зээлд нэвтэрсэн ChatGPT энэ оны эхээр дэлхий даяар 100 сая гаруй хэрэглэгчтэй болж, технологийн салбарт хиймэл оюуны өрсөлдөөнийг эрчимжүүлээд байна.
Үүнтэй зэрэгцэн хиймэл оюуны технологид суурилсан “generative AI” төрлийн ийм системийг хэрхэн зохицуулах асуудалд олон орны эрх баригчид анхаарлаа хандуулаад байгаа.
Энэ долоо хоногийн Лхагва гарагт тэрбумтан Илон Маск тэргүүтэй 1,000 гаруй мэргэжилтэн ChatGPT төрлийн систем хөгжүүлэлтийг зургаан сарын хугацаанд зогсоох уриалга гаргасан юм.