Нийслэлийн Баянгол дүүргийг улстөрчид өөрийн мэт өмчлөх дуртай. АН-ын дарга асан С.Эрдэнэ нь 20 гаруй жил өөрийн мэт эзэн сууж байсан бөгөөд 2020 оны сонгуулиар МАН-д аргагүйн эрхэнд шилжүүлсэн. Тосч авсан хүн нь “Оргил”-ын буюу УИХ-ын гишүүн Ж.Ганбаатар. Учир нь, 2020 оны орон нутгийн сонгуулиар Баянгол дүүргийн ИТХ-д МАН 20, АН 18, ХҮН хоёр, МАХН нэг суудал авсан бөгөөд ИТХ-ын дарга болон Засаг даргын суудлыг авахын тулд 50-аас дээш хувийн санал авах гэж МАХН-ын ганц төлөөлөгч Э.Магнайбаярыг урвуулсан байдаг. Яг үнэндээ Ж.Ганбаатар түүнийг багагүй мөнгөөр урвуулсан гэх мэдээлэл ч байдаг.
Үүнийг батлах гэсэн мэт Баянгол дүүргийн Засаг даргаар сонгогдсон Ө.Сумъяабаатар нь УИХ-ын гишүүн Ж.Ганбаатарын гэх хүмүүсийг хорооны Засаг даргаас эхлээд дүүргийн Засаг даргын Тамгын газрын дарга хүртэл томилсон байдаг. Зөвхөн томилоод зогсохгүй Ж.Ганбаатарын туслахыг ЗДТГ-т ажилладаг гэх хуурамч тушаал гарган гадаадад аялуулсан гэх зэрэг зөрчил нэг бус гарсан.
Мөн дүүргийн санхүүд хийсэн аудитын шалгалтаар цар тахлын хүнд үед Засаг дарга Ө.Сумъяабаатар нь байгуулагдаад сар ч болоогүй компаниас сонгон шалгаруулалтгүйгээр 69 сая төгрөгөөр чихэр худалдаж авах гэрээ байгуулсан. Мөн Засгийн газраас хэмнэлтийн горимд ажиллах 43 дугаар тогтоолыг зөрчсөн зардал цөөнгүй гаргасан, тэрбум гаруй төгрөгийн зөрчилтэй гарсан гээд үндсэндээ огцрох “болзлоо” аль эрт бүрэн хангачихсан.Тиймээс 2022 оны гуравдугаар сарын 25-нд дүүргийн ИТХ-ын ээлжит хуралдаанаар Засаг дарга Д.Сумъяабаатарыг огцруулахыг 40 төлөөлөгчөөс 29 нь дэмжиж гар өргөсөн.
Гэвч нийслэлийн МАН АН-ын 18 төлөөлөгчтэй хамт гар өргөж, Засаг дарга аа огцрууллаа хэмээн гишүүддээ анхааруулж, аваад үлдсэн ч гэдэг. Өөрөөр хэлбэл, Баянгол дүүргийн МАН-ын дарга Ж.Ганбаатарт боломж олгон нийслэлийн МАН-ын дарга Д.Сумъяабазар нүд аниад өнгөрсөн байдаг.
Гэвч өнгөрсөн нэг жилийн хугацаанд Засаг даргын үйл ажиллагаа сайжрах байтугай ахицтай, нааштай үр дүн гараагүй учраас өчигдөр Баянгол дүүргийн ИТХ-ын 15 төлөөлөгч Засаг дарга Ө.Сумъяабаатарт хариуцлага тооцох асуудлыг ахин оруулж ирсэн байна. ИТХ-ын энэ удаагийн хуралдаанд оролцвол зохих 38 төлөөлөгчөөс 33 нь ирж, олонхын саналаар Засаг даргыг огцруулах шийдвэр гаргасан байна.
Дүүргийн Иргэдийн төлөөлөгчийн хурал бол иргэдийн төлөөллийн байгууллага. Тиймээс Засаг даргад хариуцлага тооцох нь тэдний эрх үүрэг. Харин үүнд нь, УИХ-ын гишүүн, сайд хэнбугай ч байсан нөлөөлөх нь иргэний эрхэнд халдаж буйгаас ялгаагүй. Ө.Сумъяабаатарыг УИХ-ын гишүүн Ж.Ганбаатар энэ удаад цээжээрээ хамгаалах эрхгүй. Учир нь, түүний ажиллаж байгаа Засгийн газар авлига, албан тушаалын гэмт хэрэгтэй тэмцэх таван “Ш” ажиллагааг эхлүүлсэн. Өөрөөр хэлбэл, авлига албан тушаалын гэмт хэрэгтэй тэмцэл өрнүүлж буй энэ цаг үед Ш ажиллагаа Ж.Ганбаатарт хамгийн их хамаатай ч байж мэдэх. Ядаж л өөрийнх нь хөдөлгөдөг олон утасны нэг үзүүрт буй асуудалтай этгээдээс салъя гэж бодвол чаргууцалдаад байлгүй хайчлаад явах ёстой.
Эсвэл хамтдаа орооцолдоод МАН-ын даргын ширээн дээр очих уу гэдгээ сонгох биз. Нийслэлийн МАН-ын дарга Д.Сумъяабазарын хувьд ИТХ нь гурав дахиа огцруулж байгаа даргыг ахиад илээд өнгөрөөвөл намынхаа бодлогын эсрэг үйл ажиллагаа явуулсан болох нь тодорхой.
