Циркийн байр нь байгаа ч ашиглах боломжгүй учраас өнөөдөр мэргэжлийн циркчид зориулалтын байргүй, Бөхийн өргөө болон Дашчойлон хийдийн байранд циркийн үзүүлбэрээ үзүүлж, сургуулилтаа хийж, циркт хайртай ард түмэн, хүүхэд багачуудаа чадлынхаа хэрээр баясгаж байна. Гэхдээ зориулалтын бус газарт циркийн үзүүлбэр үзүүлнэ гэдэг эрсдэлтэй. Таван минутын үзүүлбэрээ 5-10 жил бэлддэг циркчдийн хувьд энэ мэтээр шаардлага хангаагүй газарт тоглолт үзүүлж байгаад ямар нэг эрсдэл аюул учирвал хэн хариуцлага хүлээх вэ. Циркийн зориулалтаар барьсан барилгыг ах дүүсээрээ хувьчлаад, худалдаад авсан Д.Сумъяабазар, Д.Дагвадоржоос хариуцлага нэхэж чадах уу. Тодруулбал, УИХ-аас 2005 онд Улсын циркийг хувьчлах байгууллагуудын жагсаалтад оруулсан. Улмаар тухайн үеийн Төрийн өмчийн хорооны шийдвэрээр 2008 онд “Аса консалтинг” компанид шилжүүлсэн байдаг. Үүнээс хойш буюу өнөөдрийг хүртэл 15 жилийн турш зориулалтаар нь ашиглаагүй байна. Барилгыг сайжруулах зураг төслийг нь өөрчлөхөөр засварын ажлыг эхлүүлсэн хэрнээ яагаад ашиглалтанд оруулдаггүй юм бэ???
Үүнд хариулт өгөх хүн алга. Ашиглалтад оруулахгүй байгаа шалтгаанаа цар тахлын үеийн хөл хориотой холбож тайлбарлан, хувьчилж авсан нөхөд өөрсдийгөө өмгөөлдөг. Цирк бол гайхалтай урлаг. Одоо үндэсний онцлогоо шингээсэн циркийн урлагаа үзүүлэх, гайхуулах цаг болсон. Манай циркчид дэлхийд данстай ч Монголдоо мэргэжлийн тайз ч үгүй л шоовдорлогдож, орхигдсон байгаа нь үнэн.
Тиймээс Хотын захирагч Сумъяабазар аа, Нийслэлийн өнгө үзэмж болсон цэнхэр дээвэртэй циркээ хэзээ танай гэр бүлээс бүрэн бүтэн байдлаар нь хүлээж авах вэ. Таны дүү хувьчилж аваад өнөөдрийг хүртэл мянгуужингийн үлгэр болгож, худал үлгэр ярьсаар өдийг хүрлээ. Яг үнэндээ, шаардлага тавьсан нэгнийг АСА аварга далайлган зандарч загинасаар байгаа ч хэлсэн шигээ хийлгүй өнөөдөртэй золголоо. Циркийн танай гэр бүл хувьчилж авахад та хэн байсан билээ. Харин өнөөдөр та хэн болсон билээ. Таныг хотын даргаар ажиллах болсны дараахан буюу 2021 онд таны дүү циркийг чинь гоё сайхан болгоод удахгүй өгнө. Зургаан сар тэвч хэмээн зандарч байсныг та бас санаж буй биз. Харамсалтай нь, барилгыг засна хэмээн нураагаад хоёр жил гаруй болжээ.
Наад зах нь, мэргэжлийн циркчид мэргэжлийн бус газарт амь нас эрүүл мэндээ дэнслэн тавьсан саяхны тоглолтоос нь хэн бүхэн анзаарсан биздээ. Улсаараа харж, цирк ашиглалтад орохыг түмнээрээ хүлээж сууна.
Тиймээс хотын захирагч Д.Сумъяабазар аа таниас болон таны гэр бүлээс циркийн цэнхэр байшингаа ард түмэн үеийн үед нэхсээр байх болно шүү.