Даваа гарагт Диснейн гүйцэтгэх захирал Боб Игерийн мэдэгдсэнээр тус компани энэ долоо хоногоос өргөн цар хүрээ бүхий орон тооны цомхотголоо эхлүүлэх болжээ. Тус орон тооны цомхотгол нь Диснейн нийт 7,000 ажилтныг хамрах бөгөөд 3 үе шаттай зохион байгуулагдах юм.
Тэд энэ талаар өнгөрөгч хоёрдугаар сард мэдэгдсэн байсан ба орон тооны цомхотголын эхний үе шат энэ долоо хоногт эхлэх ажээ. Тийнхүү орон тооны цомхотголын хүрээнд холбогдох албаны менежерүүд халагдаж буй ажилтнууддаа мэдэгдэл хүргэх гэнэ.
Харин орон тооны цомхотголын ажлын хоёрдугаар шат дөрөвдүгээр сард, гуравдугаар шат зуны эхэнд зохион байгуулагдах юм.
Диснейн хувьд өнгөрөгч оны аравдугаар сарын нэгний байдлаар нийт 220,000 ажилтантай гэж бүртгүүлж байсан бол төлөвлөгөөт цомхотголоор тэд нийт ажиллах хүчнийхээ 3 хувийг танах ажээ.
Эх сурвалж: CNN
