Өчигдөр UG Arena-д Хасын Хүлэгүүд болон Эрдэнэт Майнерс багуудын цувралын дөрөв дэх тоглолт болж нэмэлт цаг гарсны эцэст 75-80 харьцаатай өндөрлөлөө. Уурхайчид нэмэлт цагт эцсийн мөчид хожил авч чадсанаар МСБХ-ны Үндэсний Дээд лигийн аваргын төлөө хоёр дахь жилдээ дараалан шалгарч байна.
ОНЦЛОХ ТОГЛОГЧ: Эрдэнэт Майнерс багаас өнөөдөр 10-аас дээш оноо авсан хоёр тоглогч байсан нь Пендарвис Уиллиамс, Г.Ган-Эрдэнэ нар. Пендарвис Уиллиамс 24 оноо, 12 самбар авч дабл дабл гүйцэтгэсэн бол Г.Ган-Эрдэнэ 18 оноо авч 7 бөмбөг таслалт хийжээ. Харин сэлгээнээс Н.Золжаргал 9 оноо авч тоглолтын чухал үеүүдэд холын зайн шидэлтээ унагасан. Холын зайнаас 6 шидэлтийн оролдлого хийж гурвыг амжилттай гүйцэтгэсэн.
ЭРГЭЛТИЙН ЦЭГ: Хоёр багийн тоглолт эхнээсээ өрсөлдөөнтэй өрнөсөөр дөрөвдүгээр үетэй золгосон. Хоёр багийн онооны тэргүүлэл 9 удаа өөрчлөгдөж 8 удаа тэнцсэн нь тоглолт ширүүн өрсөлдөөнтэй болсныг илтгэнэ. Дөрөвдүгээр үеийн цаг сүүлийн 01:15 секунд руу ороод байхад Эрдэнэт Майнерс багийн холбогч Г.Ган-Эрдэнийн дараалан амжилттай гүйцэтгсэн холын зайн шидэлт багаа хожигдлоос аварч нэмэлт цаг руу оруулсан юм.
Цувралын дөрөв дэх тоглолтод төвийн тоглогч О.Энхбаатар оролцоогүй ч Эрдэнэт Майнерс баг будагтай талбайд эсрэг багаасаа 18 оноо илүү авсан. Будагтай талбайгаас Хасын Хүлэгүүд баг 20 оноо авсан бол Эрдэнэт Майнерс баг 38 оноо. Хожил авсан Эрдэнэт Майнерс баг нэмэлт цагт 13 оноо авсан буюу Пендарвис Уиллиамс ганцаараа 8 оноо авсан байна.
Харин өнөөдөр лигийн талбайд Завхан Бродерс VS Тэнүүн Өлзий Металл багуудын дөрөд дэхь тоглолт явагдана. Өнөөдөр Завхан Бродерс баг хожвол цувралыг 2-2 болгож тэнцүүлэх бол Тэнүүн Өлзий Металл баг хожвол 3-1 болгож том давуу талыг авна.