Хүчтэй элсэн шуурга Бээжин болон Хятадын хойд нутгийн хэд хэдэн мужийг дайран өнгөрч, бүс нутгийг улбар шар тоосоор бүрхэж, агаарын бохирдол аюултай түвшинд хүрсэн гэж мужийн цаг уурын албаныхан лхагва гарагт мэдэгдэв. Тодруулбал, БНХАУ-ын хойд хэсгийн Шааньси, Шаньси, Хэбэй, Хармөрөн, Жилин, Ляонин, Шаньдун, Хэнань, Жянсу, Анхуй, Хубэй зэрэг мужид шар шороон шуурга болжээ.
Элсэн шуурга өнгөрсөн мягмар гаригт Монголоос үүссэн бөгөөд аажмаар Хятадын төв болон зүүн хэсэг рүү шилжсэн гэж цаг уурчид мэдээлэв. Хур тунадас ороогүй, нам даралтын салхины улмаас элсэрхэг тоосонцор ч мөн адил тус улсад шилжсэн байна.
“Монголын шар түйрэн” гэж алдаршсан шар шороо, элсэн шуурга сүүлийн хэдэн жил харьцангуй намжсан байсан бол энэ удаагийнх урьд хожид үзэгдээгүй ширүүн, хөнөөлтэй байсан гэнэ.Энэ талаар зарим хэвлэлд “Бид Монгол Улсад экологийн тэнцвэрт байдлаа хадгалахад нь туслах ёстой юм байна” гэсэн агуулгатай нийтлэл гарчээ.
Хятадын нийслэлийг өтгөн үүл бүрхэж, агаарын чанарын индекс PM10 буюу 10 микрометрээс бага диаметртэй, хамраар нэвтэрч, уушгинд хүрдэг бохирдлын тоосонцор хяналтын графикаас давсан байна гэж Бээжингийн Экологийн орчны хяналтын төвөөс мэдээлэв. Тиймээс цаг уурын албаныхан хүмүүсийг биеийн тамирын дасгал болон бусад үйл ажиллагааг гадаа явуулахгүй байхыг анхааруулж, үзэгдэх орчин бага байгаа тул жолооч нарыг сонор сэрэмжтэй байж, хурдаа бууруулахыг уриалжээ.
PM10 тоосонцрын агууламж орон нутгийн цагаар лхагва гарагийн өглөөний зургаан цагийн байдлаар нэг куб метрт 1667 микрограмм хүрсэн тул "Энэ жилийн хамгийн хүчтэй элсэн шуурга" гэж нэрлэжээ. Энэ үзүүлэлт нь Дэлхийн эрүүл мэндийн байгууллагаас тогтоосон нэг шоо метр тутамд 45 микрограмм байх өдрийн дундаж хэмжээнээс 37 дахин их юм.
БНХАУ 2000-2017 оны хооронд дэлхий дээр шинээр бий болсон ногоон бүсийн 25 хувийг дангаараа буй болгосон, энэ тал дээр тэргүүлэгч улс тул технологи, арга туршлагаа монголчуудтай хуваалцах ёстой гэжээ. Мөн Монголд үүссэн элс, шар шороон шуурга нь Хятад, БНСУ, Япон төдийгүй АНУ-д хүртэл элс, тоосны эх үүсвэр болж байгааг онцолсон байв.
Хятад улс дөрвөн шатлалт цаг агаарын сэрэмжлүүлгийн системийг ашигладаг бөгөөд улаан нь хамгийн хүнд анхааруулгыг илэрхийлдэг бол улбар шар, шар, цэнхэр өнгөтэй байна.
