Олон улсын валютын сан (ОУВС) орон нутгийн цагаар 21-ний өдөр өдгөө дайны нөхцөл байдалд байгаа Украин улсад 15.6 тэрбум ам.долларын зээл олгохоор шийдвэрлэсэн байна.
Ингэснээр ОУВС нь 77 жилийн түүхэндээ анх удаа дайны хөлд нэрвэгдэж буй улс оронд зээл олгож байгаа тохиолдол аж. Тус сангийн зүгээс мөн өдөр мэдэгдэхдээ, Украины засгийн газартай дараагийн 4 жилийн хугацаанд 15.6 тэрбум ам.долларын зээлийн хөтөлбөр буюу тус улсын үндэсний квотын 577 хувьтай тэнцэх хэмжээний өргөтгөсөн санхүүжилт олгох тухай ажлын түвшний хэлэлцээр байгуулсан болохоо онцолсон байна. Энэхүү шийдвэр ОУВС-гийн Захирлуудын зөвлөлөөр ойрын хугацаанд батлагдсаны дараа хоёр талын хэлэлцээрээр эцэслэн шийдэгдэх гэнэ.
ОУВС нь үйл ажиллагаа явуулж эхэлсэн цагаасаа хойш зээлийн эргэн төлөлт хийх чадварыг нь харгалзан аливаа дайн, үймээн самуун болж буй улс орнуудад санхүүгийн дэмжлэг үзүүлэхийг журмаараа хориглодог байсан билээ. Гэвч өнгөрсөн долоо хоногт Украинд дэмжлэг үзүүлэх зорилгоор “таамаглахын аргагүй онцгой нөхцөлд буй улс орнуудад" зээл олгох гэдэг шинэ журмыг батлан зээлийн дүрмээ өөрчилсөн юм.
ОУВС-гийн зээлийн хөтөлбөр нь хоёр үе шаттайгаар хэрэгжих аж. Юуны түрүүнд Украин улс дараагийн 12-18 сарын хугацаанд төсөв, үнэ, санхүүгийн тогтвортой байдлыг бэхжүүлэх арга хэмжээ авах ёстой гэнэ. Дараа нь макро эдийн засгийн тогтвортой байдлыг хангах, Европын холбоонд нэгдэх зорилт зэрэг үндэсний сэргээн босголтын шинэчлэлийг илүү өргөн хүрээтэйгээр хийх ёстой. Украин улс энэ удаад ОУВС-гаас дэмжлэг авч буйгаа “урдаа барин” Дэлхийн банк зэрэг олон улсын байгууллагуудаас зээл авна хэмээн найдвар тээн хүлээж буй юм.
Эх сурвалж: Maeil
