Хөгжлийн Банкны хянан шалгах түр хорооноос зохион байгуулж буй нотлох баримтыг шинжлэн судлах сонсголд Экспортыг дэмжих, импортыг орлох үйлдвэрлэлийн 888 төслийн зээлийг хэлэлцэж байна.
Шинжээч танилцуулгадаа "Гоймонгийн үйлдвэр барих төсөлд "Агь" ХХК 4.1 тэрбум төгрөгийн зээл авчээ. Тухайн үед Ерөнхий сайдын 10 дугаар захирамжаар байгуулсан ажлын хэсгийн дэд дарга О.Цогтгэрэл нь зээл авах үед тус компанийн хувьцаа эзэмшигч байсан гэх баримт бий" гэв.Үргэлжлүүлэн түр хорооны дарга, УИХ-ын гишүүн Б.Энхбаяр "Нийт 888 төсөлд зээл олгох журам бүгд зөрчигдөж байсан. Засгийн газрын хуралдаан дээр эдгээр төслөөс зөвхөн 11 нь танилцуулагдсан. Мөн "Тесо" ХХК 2013 онд 5 тэрбум төгрөгийн зээл авсан гэх баримтыг шинжээч хэлсэн" хэмээгээд О.Цогтгэрэл гишүүнээс асуулт асуув.
-Ажлын хэсгийнхэн хамаарал бүхий компаниудаараа дамжуулан зээл авах боломж байсан уу?
-Өнөөдөр ямар асуудлаар дуудагдсанаа мэдээгүй учир бичиг цаас эргүүлж харсангүй. Энд ирээд тийм ажлын хэсгийн дэд даргаар ажиллаж байсан гэдгийг сая хараад нээрээ тийм байна гээд бодож байна.
Ажлын хэсэг хуралдаж, санал гаргаад арилжааны банк руу явуулж байсан санагдана. Өөрөөр хэлбэл, арилжааны банкны шаардлагыг хангахгүй төслүүдэд зээл олгохгүй байж болно гэсэн баримт бичгийг ажлын хэсгээс гаргасан байх.
Хоёрдугаарт, надтай шууд болон шууд бус хамаарал бүхий компаниуд зээл авсан гэх баримт гаргаж ирлээ. Арилжааны банк нь төрийн өмнө хариуцлага хүлээгээд ААН-үүдтэй шууд гэрээ хийж байсан. Тиймээс гэрээний шаардлагыг хангасан бол Ерөнхий сайд, Ерөнхийлөгч ч арилжааны банканд нөлөөлөх боломжгүй.
Ж.Сүхбаатар: Зээлийн материал яагаад иж бүрэн бус байв. Үүн дээр тайлбар өгнө үү?
-Бодлогын хувьд алдаатай байсан гэж байна. Төрөөс эдийн засагт оролцох нь үнэндээ сайн зүйл биш. Албан тушаалтнуудын нөлөөллөөр зээл олгосон асуудал 2017 оны ЖДҮ-ийн хэрэг дээр үүссэн.
