Монголбанк 2023 онд инфляцыг дунджаар найман хувьд барихаар төлөвлөсөн.
Үүнийхээ хүрээнд мөнгөний бодлогын хүүг аажмаар нэмж буй билээ. Одоогийн байдлаар инфляц улсын хэмжээнд 12.3 хувьтай байгааг Үндэсний статистикийн хорооноос мэдээлсэн. Тэгвэл Монголбанк зорилтдоо хүрч энэ оны дөрөвдүгээр улирал гэхэд инфляцыг нэг оронтой тоонд оруулна, тэр нөхцөл нь ч бүрдсэн гэв.
Энэ талаар Монголбанкны ерөнхийлөгч Б.Лхагвасүрэн "Бид энэ ондоо багтаад инфляцыг зорилтот түвшинд хүрнэ гэж харж байна. Инфляц алгуур саарч байна. Монголбанкны төсөөллөөр 2023 оны дөрөвдүгээр улиралд инфляцыг найман хувьд, 2024 оны дөрөвдүгээр улиралд долоон хувьд хүрнэ гэж харж байна" гэж ярьсан юм.