АН-ын ээлжит "4/11 хэвлэлийн бага хурал"-аараа Улсын Дээд шүүхийг бүрэн бүрэлдэхүүнээр нь татан буулгах үндэслэл, шаардлагыг танилцуулж, Захиргааны хэргийн шүүх, АТГ-т гаргасан өргөдөл, гомдлын мөрөөр авч байгаа арга хэмжээний талаар танилцууллаа.
Энэ үеэр С.Эрдэнэ "Ний нуугүй хэлэхэд АН-ын даргын бүртгэлийг хийх явц улсын Дээд шүүх хэрхэн ялзарч, доройтож, эрх зүй, шударга ёсны хувьд итгэх итгэл, найдвар үлдээгүй юм байна гэдгийг харуулж байна. Өнгөрөгч хоёрдугаар сарын 18-нд болсон Үндэсний бодлогын хорооны хуралдаанаар бид энэ асуудлыг авч хэлэлцсэн. УИХ дахь АН-ын бүлгийн хэдэн нөхдүүд эвлэрлийн ажлын хэсэг гэдгийг байгуулсан. Тус эвлэрлийн гэх ажлын хэсэг нь намын дотоод хэрэг рүү эрээ цээргүй халдаж, үндсэн дүрмэнд байхгүй зүйл заалтыг хэрэгжүүлж байна.
Улсын Дээд шүүх аливаа улс төрийн намын дотоод хэрэгт оролцох ёсгүй хуулиараа. Гэтэл намын дотоод үйл ажиллагаанд оролцож, ҮБХ-ны хуралдаан хүчин төгөлдөр мөн эсэхийг шийдэх ёсгүй. 2017 онд ҮБХ-нд гишүүн байсан хүмүүсийг одоог хүртэл гишүүн мэтээр үзэж тооцож байгаа нь хууль эрх зүйн үндэслэлгүй.
Улсын Дээд шүүх хуулийг завааруулдгийн сонгодог жишээ боллоо. Улсын Дээд шүүх улс төрийн намын даргад бүртгүүлэх тухай Ч.Өнөрбаяр, Л.Гантөмөр нарын хүсэлтийг маш богино хугацаанд, маш яаралтайгаар улс төрийн хүчирхийлэл үйлдэх замаар хийсэн. Улсын Дээд шүүх манай намын Үндсэн дүрмийн хэд хэдэн заалтыг ноцтой зөрчсөн, халдсан учир Улсын Дээд шүүхийн гаргасан 10 дугаар тогтоолыг Захиргааны хэргийн шүүхэд өгсөн" гэлээ.
