Монгол Улсын Ерөнхий сайд Л.Оюун-Эрдэнийн БНСУ-д хийсэн айчлалын үр дүн эхнээсээ гарч, 2 улсын хооронд агаарын нислэгийн тоо, багтаамж нэмэгдээд байна.
Тодруулбал, Улаанбаатар хотоос Сөүл хот руу 7 хоногт 44 нислэг үйлдэж байсан бол одоо БНСУ-ын 4 хот руу 80 удаа буюу өдөрт 11 нислэг хийж байна. Мөн карго нислэгийн тоог нэмснээр 1 кг ачааны үнэ 7 ам.доллар байсныг 2.5 ам.доллар болгож бууруулаад байна.
Засгийн газрын өнөөдрийн ээлжит хуралдаанаар Катар, Кувэйт улстай агаарын тээврийн хэлэлцээр байгуулахад гарын үсэг зурах эрхийг ЗТХ-ийн сайд С.Бямбацогтод олгожээ. Тэрбээр мэдээлэхдээ, “Хэлэлцээрт гарын үсэг зурснаар Ойрх Дорнод, баруун Азийн орнууд руу шууд нислэгтэй болох, шууд нислэгээр экспортын ачаа тээврийг нэмж, аялал жуулчлалыг хөгжүүлэхэд хувь нэмэр оруулна гэж үзэж байгаа. Одоогоор Монголын авиа компаниуд 105 чиглэлд нислэг үйлдэх боломжтой болсон” хэмээв.
Түүнчлэн, өнгөрсөн нэгдүгээр сард үзэглэсэн Монгол Улс АНУ-тай агаарын нислэг үйлдэх хэлэлцээрт зургаадугаар сард гарын үсэг зурснаар 2 улсын хооронд шууд нислэг үйлдэнэ. Энэ онд Австрали улстай агаарын нислэгийн хэлэлцээр байгуулахыг зорьж байгаа. Мөн Грек, Унгар, Их Британи улс руу шууд нислэг үйлдэх агаарын тээврийн хэлэлцээрийг оны эхний хагас жилдээ багтаан байгуулснаар дэлхийн агаарын тээврийн гол зангилаа цэгүүдтэй шууд нисэлг үйлдэх боломж бүрдэх юм.
Агаарын харилцааны хэлэлцээрийн хүрээнд Монгол Япон Улсын хооронд 7 хоногт 26 удаа нисэж байсныг 62 буюу өдөрт 10 нислэг үйлдэх боломжтой болгожээ. Монгол, Тайланд хооронд 7 хоногт 10 удаа нисэж байсан бол одоо 30 орчим удаа нисэж байгаа. Монгол Турк хооронд 7 хоногт 6 удаа нисэж байсан бол 34 буюу өдөрт 5 нислэг хийх болжээ. Бээжин хотруу 7 хоногт тал тус бүр 21 буюу 42 удаа өдөрт 6 удаа нислэг үйлдэх боломж олгоод байгаа аж. Мөн “Туркиш эйрлайнс” компани аяллын дугаар хувааж эзэмших, дуртай улс руугаа нисэх боломж бүрдүүлжээ.
Дотоодын агаарын тээвэрлэгч компани 2022 онд агаарын 13 хөлөг оруулж ирсэн бол энэ онд том оврын 4, орон нутгийн нислэгт 2 онгоц авах юм. Тухайлбал, МИАТ компани Боинг 787-900 маркын 2 том онгоц оруулж ирснээр АНУ, Австрали, Европ руу шууд нислэг үйлдэх юм.
Түүнчлэн, Улаанбаатар-Бээжин чиглэлд нислэгийн билетын үнэ 3 сая байсан бол 1.0-1.2 сая төгрөг, Улаанбаатар-Станбул чиглэлийнх өнгөрсөн онд 2 талдаа 4 сая байсан нь 2.2 сая төгрөг болж буурсан байна. Мөн Сөүл рүү 2.5 сая төгрөгөөр билет захиалж байсан нь 1.2-.1.5 сая төгрөг болсон байна. Монголын авиа компаниуд 100 гаруй чиглэлд нислэг үйлдсэнээр жилд 3 сая зорчигч тээвэрлэх боломжтой гэж байгаа. Өнгөрсөн онд 500 мянган зорчигч тээвэрлэсэн бол энэ онд 1.5 сая зорчигч тээвэрлэнэ гэж төлөвлөөд байгаа.
Он гарснаас хойш ИНЕГ-аас ОХУ-ын 3 авиа компанид Монгол улс руу нисэх, Туркийн компанид ачаа тээврийн нислэг үйлдэх зөвшөөрөл олгоод байна. Манай улсын хувьд навигацын орлого өнгөрсөн онд 2019 оныхтой харьцуулахад 5 дахин багассан. Үүний шалтгаан нь ОХУ-ын нөхцөл байдлаас үүдэн тус улсын агаарын орон зайд нислэг үйлдэхийг хориглосноор бусад улсын онгоц Монголыг тойрч нисэх болсонтой холбоотойг салбарын сайд тайлбарлалаа.