Улсын ерөнхий прокурор Б.Жаргалсайхан Хөгжлийн банкны хэрэгтэй холбоотойгоор УИХ-ын гишүүн Г.Амартүвшин, Х.Ганхуяг, Н.Алтанхуяг, Ё.Баатарбилэг нарын бүрэн эрхийг түдгэлзүүлэх саналыг УИХ-ын даргад хүргүүлсэн боловч амжилт олоогүй. Тэгвэл АТГ-аас Ё.Баатарбилэг нарын яллагдагчаар татагдсан 4 гишүүний бүрэн эрхийг түдгэлзүүлэх саналыг дахин гаргахаар болжээ. Дээрх 4 гишүүн гэм буруутай нь тогтоогдвол 2-8 жилийн ял авах хуулийн заалттай. Энэ удаа Ерөнхий прокурор Б.Жаргалсайхан эдгээр 4 гишүүний асуудлыг нууцын зэрэглэлгүй ил оруулж ирэх хэрэгтэй.
УИХ-ын нэг ангийн нөхөд нь ямар санал өгөх, ямар бодолтой байгааг ард түмэн ч харж аваг. Хэн эсэргүүцэж, хэн өмгөөлж байгааг сонгогчид нь ч харах эрхтэй. УИХ-ын гишүүн Т.Доржханд "Энэ асуудлыг УИХ нээлттэй хэлэлц. Нээлттэй хэлэлцвэл бие биеэ хайрлаж, өмөөрч чадахгүй шүү дээ. С.Ганбаатар ямар шударга улстөрч билээ. Гэтэл хаалттай хуралдааны үеэр Хөгжлийн Банктай холбогдсон улстөрчдийг хамгийн их хамгаалсан хүн бол С.Ганбаатар. Яагаад гэвэл өөрийнх нь асуудал Хөгжлийн Банканд байгаа юм байна" гэсэн юм. Хаалттай хэлэлцэхээр бүх юм тохироо, хуйвалдааны зарчимаар шийдэгдэнэ.
УИХ гишүүдээ хамгаалаад аваад үлдвэл ахиж бусад гишүүдийг Б.Бейсен, А.Адъяасүрэн, С.Бямбацогт, Г.Дамдинням нарыг нэмж оруулж ирэх ёстой. Тэгж байж л Их хурлын гишүүдийг дараагийн сонгууль хүртэл нь энэ асуудалтай зууралдуулж чадвал төр цэвэрших тийшээгээ орох бизээ. "Дархан цаазат амьтан" гэдэг шиг л өөрсөддөө сэтэр зүүчээд хуулиас нуугдаад байж байх нь ёс зүйгүй үйлдэл юм. Хөгжлийн банкнаас их хэмжээний зээлийг давуу байдлаа ашиглан авсан эдгээр гишүүдэд төр төмөр нүүрээ харуулан УИХ-ын гишүүнээс чөлөөлж байгаад шалгах нь хамгийн зөв алхам юм. Сангийн сайд Б.Жавхлан мэдээлэл өгөхдөө "Хөгжлийн банкны чанаргүй зээлийг төлүүлж чадахгүй бол энэ өрийг татвар төлөгчдийн мөнгөөр төлөх эрсдэл байна." хэмээсэн. Улстөрчид нь хулгайлаад, ард түмэн нь төлдөг асуудал хэзээ ч байж болохгүй.
Шударга ёс тогтооно хэмээн Ерөнхий сайд болсон Л.Оюун-Эрдэнийн ганц чаддаг зүйл нь дараагийн сонгуульд нэр дэвшүүлэхгүй байх. МАН-ын дарга, ерөнхий сайд гээд түүнд л бүх эрх мэдэл нь байхад үүнээс өөр юм хийхгүй суугаад байгаа нь гутамшигтай. Авилгачдаар дүүрсэн МАН-ын эрхэм гишүүд чухам ямар шийдвэр гаргахыг ард түмэн хүлээсээр байна. Хэрэв энэ чигээрээ байвал МАН дараагийн сонгуульд г\ард түмнээр дүнгээ тавиулах биз ээ.
МАН-ын Ерөнхий нарийн бичгийн дарга Д.Амарбаясгалан: МАН-ын дүрэмд албан ёсоор гэмт хэрэг, авлига албан тушаалын хэрэгт холбогдсон этгээдийг бүх түвшиндээ улс төрийн үйл ажиллагаанд оролцуулахгүй гэдэг заалтыг нэмсэн. Намын дүрмийг ингэж өөрчилсөн нь ёс суртахууны хэм хэмжээг өндөр байлгах суурийг тавих зорилготой. Хөгжлийн банкны асуудалд холбогдсон гэдэг нь тогтоогдсон намын гишүүнийг эхлээд улс төрийн намын гишүүнчлэлээс түдгэлзүүлнэ. Шүүхээс гэм буруутай нь тогтоогдвол намын гишүүнчлэлээс хасаж, насан туршдаа улс төрийн үйл ажиллагаанд оролцох эрхийг нь хаана. хэмээн мэдэгдэж байсан. Харин ёс суртахууны хэм хэмжээ нь өндөр байх ёстой УИХ-ын гишүүд нь ялзарсан гэдгийг Хөгжлийн банкны хэрэг явдал тодорхой харуулж байна.
Ч.Амартүвшин
