Үе тэнгийнхээ охидод зодуулж 15 настай охин амь насаа алдсан гэх хэрэг Ховд аймагт гарсан билээ. Уг хэргийн мөрөөр тус аймгийн Ховд.мн сайт талийгч охины ар гэрээс болон холбогдох албаныханаас мэдээллийг тодруулж нийтэд хүргэсэн. Энэ үеэр олны анхаарлыг татахуйц олон зүйл ил болохоос гадна зарим эргэлзээ төрүүлэхүйц зүйлс гарч ирэв.
Талийгч охины ээж хэвлэлд өгсөн ярилцлагадаа: "Манай охин хамгийн сүүлд эмнэлэгийн хаалгаар орохдоо ээжийгээ татаж үнсээд, намайг дрөвөн охин турбагаар цохисон гэж хэлсэн. Охины маань гар, хөл мэдээгүй болж эхэлсэн байсан" гэдгийг онцолсон.
Харин түүний нагац эгч: "Хүүхдийн нугаснаас яагаад ус авав. Хэрвээ ус аваагүй бол амьд байх байсан ч юм билүү. Эмнэлгийн байгууллага яагаад зүгээр гээд явуулаад байсныг гайхаж байна" хэмээсэн.
Ховд аймгийн БОЭТ: Эмнэлзүй дээр тархины хүнд гэмтэл гэдэг онош тавьсан. Талийгаач хүүхэд тархины хорт хавдартай байгаагүй. Тухайн үед манай эмнэлэгт ирж үзүүлэхэд эмнэлэгт хэвтэх хэмжээний хүндрээгүй байсан гэх хариултыг өгсөн байдаг.
Талийгч охины үеэл, найзуудаас Ховд аймгийн цагдаагийн газар зүй бусаар мэдүүлэг авчээ
Тодруулбал, талийгч охины найзаас нэр бүхий цагдаа нар аман байцаалт авахдаа асран хамгаалагчгүйгээр, ёс бус үг хэрэглэж авсан. Мөн "хэргийг чам дээр тохно шүү хэмээн" сүрдүүлсэн байна.
Энэ тухай түүний найз хэлэхдээ "Хоёр цагийн үед бид гурвыг цагдаагийн газар авч очсон. Намайг нэг цагдаатай хамт доод давхрын жижиг өрөө рүү оруулсан. Харин нөгөө хоёр охиныг дээшээ гурван давхар руу оруулсан. Тэгээд байцаалт авч байгаад намайг дуудсан. "Яагаад чи худлаа хэлээд байгаа юм" гэхээр нь би үнэнээ хэлсэн шүү дээ ах аа гэсэн чинь нэг цагдаа намайг резинэн бээлийгээр ороолгох гээд гараа далайсан. Тэгээд би айгаад бие чичрээд, хойшлоод.
Тэр үед өрөөнд олон цагдаа байсан. Тухайн үед надад "чи хүнтэй унтаж үзсэн үү, үнэнээ хэл. Маргааш эмнэлэг дээр очоод онигоо болно шүү" гэж хэлсэн. Би хариуд нь үгүй ах аа гэсэн чин утсаа далайгаад, "чи архи уучих юм биш үү, бараг" гэсэн. Харин тэр цагдаа нар дунд нэг нь уучихсан согтуу байсан" гэсэн юм.
Ховдын цагдаагийн энэ үйлдэл бүхэлдээ хууль зөрчсөн хэрэг. Учир нь насанд хүрээгүй хүүхдийг асран хамгаалагчгүйгээр дуудаж байцаасан. Ингэхдээ ёс бус үг хэллэг хэлж, үйлдэл хийж хүүхдийн сэтгэлзүйд нөлөөлсөн аж. Тус аймгийн цагдаагийн газар хэрэг гараад сар хагасын хугацаа өнгөрчихөөд байхад огт мэдээлэл хийгээгүй. Тэдний тухайн хэрэг дээр ажиллаж буй ажлын явцын зах зухаас дурдахад л ийм байж боломгүй жишээ гарч байна.
Тухайн хэрэг дээр ажиллахаар Улаанбаатар хотоос цагдаагийн албаны баг томилогдон ажиллаж эхэлжээ.