Шүүхээс О.Мөнхжин, Б.Эрхэмбаяр, Б.Гантиг нарт хилийн хориг тавив.
Тодруулбал, IHC-ийг зах зээлд гаргасан таван хүнээс О.Мөнхжин, Б.Эрхэмбаяр, Б.Гантиг нарыг мөрдөн байцааж байгаа билээ. Мөрдлөгийн хүрээнд тэднийг 461 дүгээр хорих ангид 48 цаг саатуулж, үргэжлүүлэн хорих саналыг прокуророос шүүхэд гаргасан юм.
Тэгвэл Сүхбаатар дүүргийн Эрүүгийн хэргийн анхан шатны шүүхээс мөрдөгч, прокурор нь Эрүүгийн хэрэг хянан шийдвэрлэх тухай хуулийг ноцтой зөрчсөн гэж үзэж, саналыг хүлээж авсангүй. Харин эрүүгийн хэрэг хянан шийдвэрлэх ажиллагааны явцад санаатай саад учруулахгүй байх, яллагдагч эрүүгийн хэрэг хянан шийдвэрлэх ажиллагаанд саад учруулахгүй байх үүднээс тэднийг Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авч шийдвэрлэв.
Тэднийг Эрүүгийн хуулийн тусгай ангийн 18.19 дүгээр зүйлийн 2 дахь хэсгийн 2.1, 2.2 дахь заалтад тус тус заасан гэмт хэрэгт холбогдуулан яллагдагчаар татсан юм.
Эрүүгийн хуулийн 18.19 дүгээр зүйл
Виртуал хөрөнгийн үйлчилгээний дотоод мэдээллийг хууль бусаар ашиглах
Виртуал хөрөнгийн үнэ цэнэд нөлөөлөх нийтийн хүртээл болоогүй дотоод мэдээллийг ашиглаж виртуал хөрөнгийн арилжаанд оролцсон, эсхүл дотоод мэдээллийг бусдад дамжуулсан бол хоёр мянга долоон зуун нэгжээс арван мянган нэгжтэй тэнцэх хэмжээний төгрөгөөр торгох, эсхүл зургаан сараас хоёр жил хүртэл хугацаагаар зорчих эрхийг хязгаарлах, эсхүл зургаан сараас хоёр жил хүртэл хугацаагаар хорих ял шийтгэнэ.
Энэ гэмт хэргийг бүлэглэж, албан тушаалын байдлаа урвуулан ашиглаж үйлдсэн бол хоёр жилээс найман жил хүртэл хугацаагаар хорих ял шийтгэнэ.