2014 оны долдугаар сард Монголын нутаг дэвсгэрт тэмдэглэгдэж байсан хээрийн галуу БНЭУ-ын "Коонтанкулам-Каданкулам" шувуудын цэцэрлэгээс олдсон байна. Энэ талаар тус улсын "Times of India" хэвлэл мэдээлжээ.
Нэгдүгээр сарын 28-ны орой "Агастьямалай" байгаль хамгаалах төвийн ахлах судлаач Мативанан, зураглаач Манимутару, Балачандар нар тус цэцэрлэгийн усан санд ногоон туузтай хээрийн галуу байгааг анзаарчээ. Галуу тэдний гэрэл зурагт бууж үлдсэн тул судалгааны явцад Монголд тэмдэглэгдэж байсан нь тодорхой болсон байна.
Судлаач Мативанан "Ногоон туузыг Монголын шувуу судлаачид ашигладаг. Тийм учраас энэ талаар Монголын Зэрлэг амьтан хамгаалах судлах төвийн эрдэмтэн Н.Цэвээнмядагт мэдэгдсэн. F60 хэмээн тэмдэглэгдсэн энэ шувууг 2014 оны долдугаар сарын 7-ны өдөр, Архангай аймгийн Тэрхийн цагаан нуурын баруун хойд булангаас илрүүлж, Б.Нямбаяр хэмээх эрдэмтэн бүртгэж авч байжээ" хэмээн ярьсан байна.
Өөрөөр хэлбэл есөн жилийн өмнө Тэрхийн цагаан нууранд "сэлж" явсан галуу өдгөө Энэтхэгт иржээ. Энэ эр галуу 2340 гр жинтэй байсан гэнэ. "Коонтанкулам-Каданкулам" шувуудын цэцэрлэгт нь хиймлээр тохижуулсан газар. Орон орны нүүдлийн шувууд энд ирж, зусдаг ажээ.