“Sony” компани 2022 оны IV улиралд 7.1 сая нэгж “Playstation 5” консол борлуулжээ
“Sony” компанийн “Playstation 5” консолийн борлуулалт өссөнөөр тус компанийн орлого шинжээчдийн таамгийг давж, бүтэн жилийн ашгийн төсөөлөл нь ч өсөөд байна.
“Sony” IV улиралд 7.1 сая нэгж “Playstation 5” консол борлуулсан нь гуравдугаар сараар эцэслэх санхүүгийн улирлын борлуулалтын төсөөллөө 19 сая нэгж болгон өсгөхөд нөлөөлжээ.
Үүнээс гадна тус компани үйл ажиллагааны ашгийн төсөөллөө есөн тэрбум ам.доллароос 9.1 тэрбум ам.доллар болгон нэмэгдүүлсэн байна.
“Morningstar Investment Service”-ийн шинжээчийн үзсэнээр дэлхий даяар эрэлт буурч байгаа энэ цаг үед “Sony”-ийн ашиг таамаглалд нийцсэн нь гайхалтай хэрэг бөгөөд энэхүү амжилтаа хэр удаан хадгалж чадах эсэх нь тус компани хэр их бүтээгдэхүүн нийлүүлж чадахаас хамаарах аж.
2020 онд “PlayStation 5” консол худалдаанд гарснаас хойш борлуулалтад нь саад учруулж байсан чипийн нийлүүлэлтийн асуудал өдгөө байхгүй болсныг “Sony” компани энэ долоо хоногийн эхээр онцолж байсан юм.
“PlayStation 5” консолын нийлүүлэлт нэмэгдсэнтэй зэрэгцэн тус компани алдарт “God of War Ragnarok” цуврал видео тоглоомын шинэ хувилбараа танилцуулсан нь онцлох үйл явдал болж байна.
