УИХ-ын гишүүн Т.Доржханд цаг үеийн асуудлаар Төв талбайд мэдээлэл хийлээ. Нийгэмд үүссэн хулгай луйврын асуудлыг тогтолцоогоо өөрчлөхгүйгээр шийдэж чадахгүй байна гэж мэдэгдэв. Тиймээс “Хамтдаа өөрчилье” гэх аяныг зарлаж байгаа юм байна.
Тэрээр “Бид жилийн өмнө “Өөрсдөө өөрчилье, үгүй бол тар” гэдэг жагсаал хийж байсан. Гол агуулга нь Монгол Улс хөгжих юм уу, үгүй юм уу. Цаашид 30 жилийн өнөөгийн тогтолцоогоо авч явах уу, үгүй юү гэдэгт залуус, иргэдээ сонсох зорилго тавьсан. Ирээдүйдээ боломж олгож өөрчилье, өөрчлөхгүй бол УИХ таръя гэдэг тайван жагсаал хийж байсан. Үүнээс хойш бүтэн жил өнгөрч байхад олон үйл явдал боллоо. Эндээс том хулгайн ард төр байна гэдгийг бүгд харлаа. Манай төр маш гүнзгий гацсан байна. Энэ гацааг гаргахгүй бол цаашид Монголд хөгжил байхгүй юм байна. Авлига, хулгайг дийлэхгүй нь. Цаашид төр төвтэй, төрийн компанид дээр үндэслэсэн хулгай зогсохгүй юм байна. Иймээс тогтолцооны өөрчлөлт хийе гэж маш олон иргэн, залуус саналаа өгсөн. Бид 21 аймаг, есөн дүүрэг, 330 сум 200 гаруй хороодоор явж 100 мянга гаруй иргэдийн гарын үсэг цуглуулж, УИХ-д өгч байсан. Иргэд тогтолцооны өөрчлөлтийг хүсээд байна гэдгийг илэрхийлсэн. Харамсалтай нь иргэдийн шаардлагыг УИХ шийдвэрлэж чадаагүй. Үүний улмаас өвөл нүүрсний хулгайг эсэргүүцэн нийтээрээ жагслаа. Өнөөдөр койн гээд бөөн асуудал. Ирэх долоо хоногт Хөгжлийн банк гээл ярина. Ер нь хулгай ярьсаар байгаад бид дуусах нь. Тиймээс тогтолцооны асуудлаа шийдье гэхээр тэгье, тэгье Үндсэн хуулиа шинэчлье гээд өвөө нар гараад ирлээ. Давуулж шийдээд дэглэм өөрчлөх асуудал ярьж байгаа нь буруу.
ХҮН болон иргэд залуусын зүгээс өөрчилье л гэж хүсч байгаа. Авлига, хулгайг өөрчлөөд, бодит орлогыг өсгөөд өгөөч,тухтай амьдруулаад өгөөч л гэж байгаа. Иймд, “Хамтдаа өөрчилье” гэдэг аяныг зарлаж байна. ХҮН бэлэг тараахгүй, харин мэдээлэл түгээнэ. Үндсэн хуульд ямар нэмэлт өөрчлөлт оруулах, тогтолцоог яаж өөрчлөх талаар мэдээлэл түгээнэ" гэлээ.
