БХБ-ын сайд Ц.Даваасүрэн Засгийн газрын ээлжит хуралдаанаас гаргасан шийдвэрийг танилцуулах үеэрээ "Манайд дотооддоо арьс ширний үйлдвэр барина гэхээр гадна дотны зориуд зохион байгуулалттайгаар бүтээн байгуулалтыг зогсоодог. Би дотоодыг нь шууд хэлэхэд манай арьс ширний компаниуд юм. Тэд хямдхан арьс авахыг боддог. Одоо арьсны үнэ унаад, хог болоод хэвтэж байгаа.
Хэрэв Дарханы арьс ширний цогцолбор ашиглалтад орчихвол арьс үнэд орно. Яагаад гэвэл хүйтэн нөхцөлийн арьс ширээр хамгийн үнэтэй, удаан эдэлгээтэй хувцас, эдлэлүүдийг хийж болдог. Буйдангийн бүрээс, эмэгтэй хүний нарийн эдлэлүүдийг манай хонь ямааны арьсаар хийдэг. Халуун орны арьс нягтралгүй учраас болдоггүй.
Ийм үнэтэй арьсыг 90-ээд оноос хойш гадна дотны нөлөөллөөр унагаасан. Үүнийг босгох гэхээр хэвлэл мэдээллээр янз бүрийн юм цацаад үйлдвэрийг аль болох явуулахгүй байх юм явдаг учраас төрөөс барих гэж байсан арьс ширний үйлдвэр зогсонги байдалтай байна.
Хэрэв барьчихвал арьс шир үнэд орно, хөдөөгийн малчид орлоготой болно. Нөгөө талаар манай экспортын орлого 200 сая ам.доллароор нэмэгдэх бүрэн боломжтой. Хөдөө рүү орлого орвол наашаа нүүх нь багасна.
Хувийн компаниуд хөхрүүлээд арьс шир болгоод гадагшаа хямдхан өгч байгаа. Хэрэв үйлдвэр баригдвал H&M, Zara манай арьс ширийг булаацалдаад авна. Ийм хэмжээний орлоготой болохоос нэг хэсэг нь айгаад байна. Нөгөө хэсэг нь хямд арьс ширээ цуглуулж байхыг бодсон зүйл л байгаа" гэлээ.
