Өнөөдөр/2023.02.02/ өглөө нийтийн тээврийн автобусны эд ангид гал гарчээ.
Нийслэлийн Онцгой Байдлын газраас мэдээлснээр Хан-Уул дүүргийн 8 дугаар хороо, "Яармагийн-2" буудал дээр автобус шатаж байна гэх дуудлага 06:13 цагт иржээ.
Аврагчдыг очиход "Daewoo" маркийн Баянхошуу-Яармаг чиглэлийн нийтийн тээврийн автобусны моторын хэсэг шатаж байсныг унтраасан байна. Энэ нь хуучин автобус болохыг нийслэлийн Засаг даргын хэвлэлийн төлөөлөгч мэдэгдэв.
Н.Сугар "Өнөөдөр шатсан автобус 2009 онд үйлдвэрлэгдсэн, "Эрдэм транс" компанийн автобус байжээ. Хамгийн өндөр насжилттай автобуснуудын нэг гэсэн үг. Гэхдээ хугацаа дууссан ч дараагийн шинэ автобуснууд ирэх хүртэл хуучин автобусаа ашиглахаас өөр аргагүй. Учир нь Улаанбаатар хотод нийт 1,400 автобус байвал хүртээмжтэй байна гэсэн судалгаа бий.
Хугацаа дууссан автобуснуудыг ашиглалтаас гаргачихвал ачааллаа дийлэхгүй. Тиймээс хот богино хугацаанд 1,000 автобус авах шаардлага үүсэж байгаа. Одоогоор 217 автобусны шинэчлэл хийсэн. Энэ сард 107 автобус орж ирэхээр үйлдвэрлэх шатанд явж байгаа. Мөн түгжрэлийн сайдын багцаас 300 автобус авах төсөв суугдсан. Үүнийг 800 болгох боломжтой гэж сайд хэлж байсан" хэмээн тайлбарлалаа.