Ираны Батлан хамгаалах яамнаас Исфахан хотын ойролцоох цэргийн байгууламж руу гурван дроноор хийсэн халдлагыг няцаасан гэж мэдэгдэв.
Хэдийгээр Ираны арми халдлагыг няцаасан гэж мэдэгдэж байгаа ч Израилийн хэвлэл мэдээллийн хэрэгслүүд Иран дахь цэргийн байгууламжид өгсөн цохилт амжилттай болсон гэж бичжээ.
Цохилтод өртсөн газрыг тодорхой нэрлээгүй ч IRNA агентлаг үүнийг зэвсгийн үйлдвэр гэж мэдээлсэн байна.
Ираны төв нутгийн Исфахан муж дахь цэргийн зэвсгийн үйлдвэр рүү дроны халдлага үйлдсэн тухай болон мөн Зүүн Азербайжан мужийн Шахид Салими хотод хөдөлгүүрийн тосны томоохон үйлдвэр шатсан тухай IRNA агентлаг мэдээлэв. Мөн Ираны баруун хэсгийн Дизфул хотын агаарын баазаас гадна Хамадан, Рашт хотуудад дэлбэрэлт болж, гал гарсан гэх мэдээлэл байна.
Хохирогч, шархадсан хүмүүсийн талаар мэдээлэл алга байна. Ираны армийн мэдээлснээр халдлагад өртсөн цэргийн үйлдвэрийн дээвэр “бага зэргийн гэмтэл” авсан байна.
Гэсэн хэдий ч Израилийн "Jerusalem Post" сонин барууны тагнуулын байгууллагуудын эх сурвалжаас иш татан, халдлага туйлын амжилттай болсон гэж мэдээлсэн байна. Уг мэдээлэлд дурдсанаар цэргийн үйлдвэрт дөрвөн удаагийн хүчтэй дэлбэрэлт болсон гэжээ.
Америкийн "The Wall Street Journal" сонин тагнуулын албаны эх сурвалжаас иш татан энэ халдлагын ард Израиль байгаа гэж бичжээ. Дараа нь энэ мэдээллийг Ройтерс агентлаг ч баталжээ.
Эх сурвалж: ВВС
