Улс төрчдийн хамаарал бүхий компаниуд Хөгжлийн банкнаас зээл авсан. Авлигал, албан тушаалын ойлгомжтой гэмт хэргүүдийг илчлэхээс бүгд айж байна. Харин "Бесон" ХХК-ийн захирал Батжаргал гэгч энэ хүн маш ноцтой зүйлүүдийг ярилаа. Түүнийг үг хэлүүлэхгүй гэж "Пирамид орд" ХХК-ийн захирал Г.Цолмонийг хоёр өмгөөлөгч эсэргүүцсэн ч өөрсдөө хурлаас хөөгдөж гарахдаа тулав. Их л ноцтой асуудлаар шүгэл үлээх нь гэж бодоод би ч анхааралтай сонслоо.
Хөгжлийн банкнаас 15 тэрбумын зээл авч Яармагт "Буман залуус"296 айлын орон сууц барьсан "Пирамид орд" компаний дуусаагүй барилгыг гүйцээхээр барилгын Ерөнхий гүйцэтгэгчээр түүний "Бесон " компани орж цутгалт хийжээ. Хөгжлийн банкны мөнгө орж ирэхээр өгнө хэмээн өр зээл тавиулж баахан ажлаа хийлгэж дуусангуутаа хөөгөөд гаргачихсан. Хөгжлийн банкны мөнгө орж ирсэн байхад ч хэлэхгүй өр зээлээр ажил хийлгэсээр байжээ. Эцэст нь өр зээлэнд орж бизнесээ алдаж, дансаа хаалгуулсан тэрээр 4 жил шүүхээр явж зүрхний шигдээс 2 удаа болсноо хэлж байна. Түүний хохироосон гол хүн нь "Пирамид орд" компаний эзэн А.Цолмон гэнэ. Г.Цолмон өөрийн баз хүргэн, насаараа шүүгч ШЕЗ-д ажиллаж байсан гавьяат хуульч Б.Дамдин-Од гэгчээр хууль шүүхээр бүх луйвраа хамгаалуулдаг. Прокурор, шүүхийн байранд ажилтан нь юм шиг явж үдийн хоолоо хүртэл хамт иддэг. Хохирогч нь үүдэн дээр камераар хараад сууж байдаг. Шүүхээс битүүмжилсэн хөрөнгийг шүүхийн шийдвэр гүйцэтгэх газрын дарга нь цуцлах шийдвэр гаргачихдаг. Мөнгөтэй хүмүүст ашигтай шийдвэрийг ганц өдрийн дотор гаргадаг мөртлөө хохирсон хүний гомдлыг 4 жил шийддэггүй хууль шүүхийн байгууллагатай болсныг хэллээ.
"Пирамид орд" ХХК- ийн захирал Г.Цолмон нь Ерөнхий сайд асан Ж.Эрдэнэбатын үед Хөгжлийн банкны зээл авсан. Түүнтэй шууд утсаар ярьж, зээл бүтнэ гэдгийг баталдаг төдийгүй энэ зээлийг төлөхгүй юм гэж анхнаасаа ярьдаг байсан гэлээ. Бас нэг ноцтой асуудал нь уг орон сууц барьсан газар нь Монголын ардчилсан холбооны нэр дээр байсан. Экс Ерөнхийлөгч Х. Баттулга ардчилалын партизануудыг бартерийн байртай болгоно гэж уг газрыг "Пирамид Орд" компанийг барьцаанд тавихыг зөвшөөрсөн. Барилга хот байгуулалтын дэд сайд асан Г. Байгалмаагийн данс руу оршин суугчдын төлбөр ордог. Г. Байгалмаа энэ асуудлаар шалгагдаж байгаа гэх мэтээр маш ноцтой зүйлүүдийг ярилаа.
"Пирамид орд " компаний барьсан орон сууц Хөгжлийн банкны барьцаанд байгаа мөртлөө оршин суугчдад давхар зарсан. Оршин суугчид нь гэрчилгээгээ авья гэхэд барьцаанд, шүүхийн маргаантай учир гардаггүй гээд маш олон асуудал ярилаа.
Монголд хууль шүүхийн байгууллага нь шударга ажилладаггүйгээс маш олон хүн хохирч байгаа нь үнэн л дээ.
Нээлттэй сонсгол маш олон луйвар булхайг ил болгож өглөө. Хууль шүүхийн байгууллагаар 4 жил явахдаа уулзаж чадаагүй Г.Цолмон гэгчийн нүүрийг энд л харж байна гэж хохирогч гэх Батжаргал нь хэллээ.