Сэтгүүлч Х.Ган-Ялалтын дэлгэсэн мэдээлэл дунд “Глоб интернэшнл"-ийн гүйцэтгэх захирал асан Т.Аюушжавыг саяхны жагсаалыг төрийн эсрэг эргүүлэхийн тулд нүүрсчдийн гар хөл болон оролцож хуульч, өмгөөлөгчдийг зохион байгуулалтад оруулж турхирсан гэдэг агуулга явж харагдав. Учир нь УИХ-ын гишүүн Т.Аюурсайханы төрсөн эгч болохоор тэд тэгж хардаж байгаа гэв.“Глоб”-ын Х.Наранжаргал, Т.Аюушжав нарын тус дэмжлэг, хичээл зүтгэлийн хүчээр үе үеийн эрх баригчдын махны машинд хэрчүүлж, орон шоронд орохоос маш олон сэтгүүлчид аврагдаж байсан нь хэн ч маргахгүй үнэн!
Монголын Сэтгүүлчдийн эвлэл нь нэг намын цүнхэнд явж ортлоо ялзарч, хууль шүүхийн дарамтад орсон сэтгүүлчдээ өмөөрч дуугарах ч сөхөөгүй явсан цаг үед тэд л сэтгүүлчдийн эрх ашгийг бодитой хамгаалж дуугарч байв. Чухамдаа “Глоб”-ынхон л сэтгүүлчдийг Эрүүгийн хуулиар шийтгэхийн эсрэг тууштай зогссон! Одоо ч тэр зорилгоосоо ухраагүй гэж итгэж байна. Т.Аюурсайхан бол улстөрч, тэр тусмаа төрийн өндөр албан тушаалтан учраас түүн рүү яаж ч дайрч давшилж, хардаж сэрдэж, гүтгэж гүжирдэж болох л биз. Харин түүний төрсөн эгч гэдгээр нь Т.Аюушжав гэдэг хүнийг бохир муухай улс төр, нүүрсний хулгайтай хутгалдсан хэмээн оргүй гүтгэх нь үнэнд яасан ч нийцэхгүй мэт!Т.Аюушжав эгч бол тийм ёс зүйгүй, муу муухай хүн биш ээ. Т.Аюурсайхан эгчийнхээ талаар “Эгч маань 2012 оны сонгуулиар намайг намд ажилладаг байхад “МАН-аас нэр дэвшигчдээс хэрвээ та сонгуульд ялвал сэтгүүлчдийг эрүүгийн хуулиар шийтгэдэг байдлыг халахыг дэмжих үү гэдэг челленж явуулах гэсэн юм. Үүн дээр холбож өгөх боломж байна уу” гэж амьдралдаа цорын ганц удаа л холбогдож байсан” гэж ярьжээ. Энэ харин үнэн байх.
Тэр тийм л хүн. Яг үнэндээ Монгол Улсын хэвлэлийн эрх чөлөөний төлөө сэтгүүлчид нь биш “Глоб”-ын үе, үеийн удирдлагууд болох Х.Наранжаргал Т.Аюушжав тэргүүтэй цөөн хэдэн хүмүүс санаа сэтгэлээ чилээн, үзэл бодлоо илэрхийлэн тэмцсэн гэвэл бас чиг худал болохгүй биз. Тэдний зарим нэг дорвитой тэмцэл, акцын ач тусаар сэтгүүлчдийг эрүүгийн хуулиар шийтгэдэг байдал өөрчлөгдөн Зөрчлийн хуульд багтах болсноор /Х.Нямбаатарын үед эргээд эрүүгийн хуульд хамаарагдах болсон/ манай улс хэвлэлийн эрх чөлөөний индексээрээ дэлхийд хэдэн байр урагшилж явсан ч үе бий.
Гэтэл одоо нэгэн цагт үхтлээ өмгөөлж хамгаалж байсан сэтгүүлчдийнхээ гүтгэлгийн гол бай нь болж, нүүрсний хулгайчдын нэг салаа мөчир мэтээр хэлүүлээд явж буй нь харамсалтай! Тэглээ гээд тэр хэн нэгэнд өчүүхэн сэтгэлээр өш санаж, том зорилгоосоо ухрахгүй биз ээ. Миний хувьд Т.Аюушжав гэдэг хүнтэй тийм ч ойр дотно байгаагүй ээ. Хэдхэн удаа уулзаж хууль, эрхзүйн зөвлөгөө авч байсан төдийхнөөр бидний харилцаа хязгаарлагддаг. Тэр үед үнэн сэтгэлээсээ тусалж, зөвлөж байсныг ч мартаагүй.Гагцхүү энэ бүхнээс илүүтэй “Глоб интернэшнл"-ийн Х.Наранжаргал, Т.Аюушжав нарын эрхэм хүмүүсийн хараат бус чөлөөт сэтгүүлзүйн хөгжлийн төлөө хийсэн нөр их ажил, хэрэгжүүлсэн олон төслийг нь бага сага хэмжээнд мэдэх хүний хувьд тэр тийм муу муухайтай холбогдох ёс зүйгүй, яадгаа алдсан хүн биш ээ л гэж хэлэх гэсэн юм...
Хүндэтгэсэн, Р.Улам-Оргих