Нүүрсний хулгайтай холбоотой нээлттэй сонсголын үеэр тээврийн жолооч нарын төлөөлөл ГЕГ-ын дарга асан Б.Асралтыг шалгахгүй байгааг гайхаж, сонсголд оролцуулалгүй сугалж үлдээсэн үйлдлийг шүүмжилж байв. Үнэхээр нүүрсний хулгайн хэргийг илрүүлэх чин хүсэлтэй бол ГЕГ-ын үе үеийн удирдлагуудаас шалгалтын ажил эхлэх ёстой. Тэр дундаа гаалийн байгууллагыг 2016 оноос хойш 6 жил удирдсан Б.Асралтыг шалгах асуудлыг орхигдуулж болохгүй.
Учир нь нүүрсний хулгайн хэрэг шууд утгаараа ГЕГ-тай холбогддог. Эрүүгийн цагдаагийн газраас “Гааль дээр бүртгэгдсэн нүүрс тээврийн машины дугаар Хил хамгаалах ерөнхий газрынхаас зөрдөг. Автомашины улсын дугаарыг шүүж үзэхээр портер, приус зэрэг машины мэдээлэл гардаг. Тиймээс Монголын хилээр хэчнээн тээврийн хэрэгсэл ямар хэмжээний нүүрстэй гарсан бэ гэдгийг нягтлахын тулд БНХАУ-ын Гаалийн байгууллагаас мэдээлэл авахаар анх 2019 онд хандаж байсан” гэдгээ мэдэгдээд буй. Товчхондоо ГЕГ-ын удирдлагууд нүүрсний хулгайн хэрэг дээр нүдээ аньж, чихээ бөглөж явж ирсэн үү, приус шалаанз хоёрыг ялгахаа байтлаа мөнгөөр нүдээ таглуулсан уу гэдгийг шалгах ажил заавал хийгдэх ёстой.
Тэгвэл өчигдөр Төрийн ордонд болсон нээлттэй сонсголын үеэр нүүрс тээврийн жолооч нарын төлөөлөл УИХ-ын гишүүн А.Адъяасүрэн, УУХҮ-ийн сайд асан Д.Сумъяабазар, ЗТХ-ийн сайд асан Б.Энх-Амгалан, ГЕГ-ын дарга асан Б.Асралт нарыг шалгахыг шаардаж байлаа.
Тээвэрчдийн зөвлөлийн тэргүүн Н.Саарал “Монгол Улсад нэг өдөрт 8 сая ам.доллар буюу 27.5 тэрбум төгрөг оруулахын тулд өдөр, шөнөгүй үр хүүхэд, хань ижлээсээ хол олон сараар хөдөлмөрлөж байгаа залуучууд нүүрсний хулгайг чинь хийсэн болж хувираад байгаа юм уу. 9 мянган жолооч буруутай гэж балай юм яриад байна. Жинхэнэ хулгайч нараа хэлээч, та нар ичихгүй байна уу. Нүүрсний хулгай ид явагдаж байх үед албан тушаал хашиж байсан хүмүүс чинь хаана байна. УИХ-ын гишүүн А.Адъяасүрэн, УУХҮ-ийн сайд асан Д.Сумъяабазар, ЗТХ-ийн сайд асан Б.Энх-Амгалан, ГЕГ-ын дарга асан Б.Асралт нар хаана байна. Би нүүрс тээвэрлэж байгаа 14 мянга 900 тээвэрчний хэлэхийг хүссэн үгийг та нарт дамжуулж байна. Энэ залуус нэг ч тонн нүүрс хулгайлаагүй шүү. Жинхэнэ хулгайч нараа шалга. Хилээр нүүрс гарч байхад ГЕГ-ын дарга байсан Б.Асралт яагаад мэддэггүй юм. Нүүрс тээвэрчид хэн зөөгөөд өгөөч гэж байсныг хэлээд өгнө. Хэрэгтэй хүмүүсээ аваад ир улайтал нь асуугаад өгье” гэсэн юм.
