Нийслэлийн Засаг дарга асан Х.Нямбаатарыг "Туулын хурдын замын төсөл"-тэй холбоотойгоор бусдад давуу байдал олгосон хэмээн Эрүүгийн хуулийн тусгай ангийн 22.1.3 буюу эрх мэдэл, албан тушаалын байдлаа урвуулан ашиглах гэсэн зүйл ангиар шалгаж байгаа гэх мэдээлэл бий. Тэгвэл Х.Нямбаатартай хамт таван албан тушаалтныг яллагдагчаар татан, мөрдөн шалгах ажиллагааг үргэлжлүүлж байгаа.
Тэгвэл Х.Нямбаатар болон үнэлгээний хорооны гишүүдээс гадна хаалганы гадна үлдсэн хамаарал бүхий байж болохуйц албан тушаалтныг дурдъя.
Үүний тулд эхлээд Туулын хурдны замын тендерт шалгарч НЗДТГ-тай байгуулсан 2.3 их наяд төгрөгийн гэрээн дээрх “Хятадын хаоюань групп”-ийн 1207336 гэх регистрын дугаарыг Хонконгийн хуулийн этгээдийн бүртгэлийн сайтаас хайвал “Chinа Hyway group limited” гэж гарч ирдэг тус компанийг ярих нь зүйтэй.
Өөрөөр хэлбэл, “Chinа Hyway group limited” компани НЗДТГ-тай 2.3 их наяд төгрөгийн гэрээ байгуулахдаа “Hyway” гэх нэрээ “Хаоюань” гэж өөрчилж орчуулсан гэсэн үг.
Chinа Hyway group limited” компани “Хятадын Хаоюань групп” болж зүсээ хувиргасан нь цаанаа хоёр том шалтгаантай байж болох ажээ.
Нэгдүгээрт, 10-аад жилийн өмнө “Chinа Hyway group limited” компани Ханын материал-Баянхошуу чиглэлийн 3.4 км замыг засах гэж хөгөө чирч, хацартаа нусаа нааж байлаа. Тэгэхээр 3.4 км замыг засаж гэж мунгинаж байсан “Chinа Hyway group limited” компани 32 км Туулын хурдны замыг барьж байна гэхээр хэнд ч эргэлзээ төрнө. Тиймээс ч “Chinа Hyway group limited” компани Туулын хурдны замын ажилд “Хятадын Хаоюань групп” гэх зохиомол нэрийг ашиглаж байгаа дүр зураг харагдаж байна.
Хоёрдугаарт, “Chinа Hyway group limited” компани нэрээрээ монголын нэр бүхий олон улс төрчтэй холбогдоно. Тиймээс ч “Хятадын Хаоюань групп” гэх зохиомол нэрийг ашиглаж байгаа бололтой юм.
“Туулын хурдны зам”-ын 2.3 их наяд төгрөгийн тендерт шалгараад буй “China Hyway Group Limited” компани 17 жилийн өмнө Монголд орж ирсэн
“Туулын хурд зам”-ын 2.3 их наяд төгрөгийн тендерт шалгарсан “China Hyway group limited” монголчууд бидэнд шинэ компани огт биш. Одоогоос 17 жилийн өмнө Монголд орж ирж, оффис, орон сууц барих газартай, орд ашиглах лицензтэй болж төвхнөсөн. Удалгүй Улаанбаатар хотын зам засварын тендерүүд оролцдог болж эхэлсэн түүхтэй. Өөрөөр бол, Монголд “бойжсон” компани гэхэд ч хилсдэхгүй болов уу.
Тодруулбал, Хятадын иргэн Лиу Дайвэн 2008 оны нэгдүгээр сарын 25-нд “China Hyway group limited” компанийг Хонконгод байгуулсан. Ингээд ердөө дараа жил нь буюу 2009 оны зургадугаар сарын 22-нд “China Hyway group limited” компани Монголд орж ирж, Хоржавын Амгалан гэгчтэй хамтран “Хувай Монголиа” ХХК-ийг байгуулж, улсын бүртгэлд бүртгүүлсэн байдаг.
10-аадхан жилийн өмнө 1.7 км зам засах 2.5 тэрбум төгрөгийн тендерт гологдож явсан “Хувай Монголиа” ХХК буюу “China Hyway Group Limited” компани одоо Туул голын дээгүүр 32.7 км зам тавих “Туулын хурдны зам”-ын 2.3 их наяд төгрөгийн тендерт шалгарчихаад байна.
“China Hyway group limited” компанийн Монгол талын хамтрагч Х.Амгалан нь “МИАТ” ТӨХК-ийн онгоцны зорчигчдийн хоолыг 15 жил хариуцсан “Нүхт тур” ХХК-ийн эзэн.
“Туулын хурдны зам”-ын 2.3 их наяд төгрөгийн тендерт шалгарч, барилгын ажлаа эхлээд буй “China Hyway group limited” компанитай “Хувай Монголиа” ХХК-ийг 17 жил хамтран эзэмшиж буй улстөр бизнесийн хүрээлэлд нэртэй бас зартай нэгэн гэж ярьцгаадаг.
Тухайлбал, Х.Амгалан нь “МИАТ” ТӨХК-ийн онгоцны зорчигчийн хоолыг 2009-2024 он хүртэл монопол эрхтэйгээр хариуцаж ирсэн “Нүхт тур” ХХК-ийн эзэн. Энэ хугацаанд “МИАТ”-ийн онгоцоор ниссэн хэн бүхэн Х.Амгалангийн “Нүхт тур” ХХК-ийн хийсэн хоолыг идсэн гэсэн үг. Намтрын тухайд, Х.Амгалан нь 1989 оноос Багануурын депод дарга, 2006 оноос “Улаанбаатар төмөр зам” ХНН-ийн Зүтгүүрийн албаны дарга, 2018-2022 он хүртэл “Улаанбаатар төмөр зам” ХНН-ийн Орлогч даргаар ажилласан нэгэн.
“China Hyway group limited” компанийн Монгол талын хамтрагч Х.Амгалангийн бизнесийн сүлжээ олон улстөрчтэй холбогдож байгааг хэвлэл мэдээллийнхэн онцолж байгаа. Үүнийг дагаад, Туулын хурдны замын 2.3 их наяд төгрөгийн тендер шударга авагдсан эсэхэд ч эргэлзээ төрөхөөр болж байна.
Ямартай ч хууль хяналтын байгууллага “China Hyway group limited” компани болон Монгол талын хамтрагч Х.Амгалангийн холбоо хамаарлын шалгах нь зүйн хэрэг. Хаалганы цаадахыг хашааны гаднаас бус дотор нь орж өнгийж харвал энэ мэт холбоо хамаарлын эргэлзээ тайлагдаж үнэн зөв нь хурдан тайлагдах биз.
Эх сурвалжууд: Ergelt.mn
Isee.mn
Ikon.mn
