УИХ-ын гишүүн Т.Доржханд мэдээлэл хийлээ. Тэрээр нүүрсний хулгайд холбогдож, яллагдагчаар татагдсан Ерөнхийлөгч асан Х.Баттулгыг хилээр гаргасан АТГ, прокурорын албан тушаалтнууд хариуцлага хүлээх ёстой гэлээ.
Тэрээр “Х.Баттулга гэж хүн өчигдөр хилээр гараад явсан байна. Үүнд хэн нэгэнд хариуцлага тооцох хэрэгтэй. 2022 оны арванхоёрдугаар сарын 22-нд нүүрсний хулгайн асуудлаар нээлттэй сонсгол явуулах санал гаргасан. Их хурлын 16 гишүүн гарын үсэг зурж дэмжсэн. Энэ сонсголд нүүрсний хулгайд холбогдоод байгаа бүх хүнийг авчраарай гэдэг хүсэлт тавьсан. Х.Баттулга гэдэг хүнээс мэдүүлгийг нь авъя. Эрдэнэс Тавантолгойн захирал асан Б.Ганхуягийг авчраад яриулъя, сонсъё гэж байсан. Гэтэл эхнээсээ зугтаачихлаа. Эрүүл мэндийн шалтгаанаар явсан гэж байна. Өмнө нь Ч.Сайханбилэг гэж хүн мөн л эрүүл мэндийн шалтгаанаар гээд гараад явж байсан. Ард түмэнд харагдахдаа төмөр өргөөд, хүдэр чийрэг биетэй, хэр баргийн өвчин тусахааргүй Ерөнхийлөгч гэж өөрөө имижээ бүрдүүлсэн хүн. Гэтэл хэрэгт холбогдоод, яллагдагчаар татагдаад ирэхээр эрүүл мэндийн шалтгаанаар явсан гэдэгт би хувьдаа эргэлзэж байна.
Бид өмнө нь яллагдагчаар татагдсан, АТГ-т шалгагдаж байгаа хүмүүст хилийн хориг тавь гэж удаа дараа хэлж байсан. Гэтэл эхнээсээ зугтаачихлаа. Одоо хилийн хоригоо тогтоо. Тэгэхгүй бол хулгайч нар чинь зугтаагаад дууслаа. Үлдэхгүй юм байна. Нэг хүн гараад явчихлаа. Одоо хэнд хариуцлага тооцох вэ. АТГ-ын удирдлагад хариуцлага тооц. Хэрвээ АТГ-аас прокурор руу явуулаад прокурор дээр энэ асуудал дарагдсан байвал ерөнхий прокурорт хариуцлага тооцох хэрэгтэй. Хэрвээ энэ хүмүүс буруугүй гэж байгаа бол Засгийн газарт хариуцлага тооцох хэрэгтэй. Хамтраад хулгай хийсэн асуудал шүү дээ. Хамсаатнаа явуулж байна гэж ойлгогдоод байна” гэлээ.
ХҮН-ын хуульч Д.Үүрцайх: Ерөнхийлөгч асан Х.Баттулга тодорхой хэрэгт яллагдагчаар татагдан шалгагдаж байгаа юм байна. Тиймээс таслан сэргийлэх арга хэмжээ авсан байсан гэж ойлгож байгаа. Хувийн баталгаа гаргах гэдэг таслан сэргийлэх арга хэмжээ авсан юм байна. Х.Баттулга хуулийн байгууллагад мэдүүлэг өгөхдөө арванхоёрдугаар сарын 18-нд гадаад улсад эмчилгээнд явах шаардлагатай гэдэг мэдээллийг өгсөн юм билээ. Нүүрсний хулгайн асуудалд гүнзгий холбогдсон, бараг толгойлогч нь гэж хэлж болохоор хүнд яагаад хувийн баталгаа гаргах гэдэг хамгийн зөөлөн таслан сэргийлэх арга хэмжээг авсан юм бэ гэдэг. Энэ бол АТГ-ын мөрдөгч өөрөө авч болох хамгийн жижиг арга хэмжээ. Тэгэхээр мөрдөгч аргагүй эрхэнд үүнийг хийсэн үү. Прокурорт бусад таслан сэргийлэх арга хэмжээ авах хүсэлт гаргасан уу. Хэрвээ энэ хүн эмчилгээнээсээ ирэхгүй бол яах вэ гэдэг олон асуудал байна.
