Японд олон хүн эх орныхоо энх тайван байдлыг хамгаалахад бэлэн байна.
Японы засгийн газар тус улсын үндэсний аюулгүй байдлын шинэчилсэн төлөвлөгөөг гаргажээ. Дэлхийн 2-р дайн дууссанаас хойш анх удаа батлан хамгаалах зардлаа хоёр дахин нэмэгдүүлэх, цэргийн хүчээ үлэмж хэмжээгээр зузаатгах, ерөнхийдөө олон улсын улс төр дэх энх тайвныг эрхэмлэх зарчмаас эрс татгалзахаар тусгаж өгсөн.
Ийм зарчмын эргэлт нь тус улсын хамгийн ойрын хөршүүд болох Хятад, Хойд Солонгосоос ирж буй заналхийлэл хурдацтай нэмэгдэж байгаад Япон санаа зовж байгаагаас үүдэлтэй юм.
Баасан гарагийн орой Ерөнхий сайд Фумио Кишида ард түмэндээ хандан телевизээр үг хэлэхдээ эрх баригчид тус улсын Үндэсний аюулгүй байдлын стратеги, Үндэсний батлан хамгаалах стратеги, Батлан хамгаалах хүчний хөгжлийн төлөвлөгөө зэрэг холбогдох гурван баримт бичгийг нэг дор баталсан гэж мэдэгдэв.
Гол шинэлэг зүйлүүдийн нэг нь Ерөнхий сайдын тайлбарласнаар "онцгой байдал, тодорхой нөхцөл байдлын үед өөр улсын нутаг дэвсгэрт цэргийн цохилт өгөх боломжтой" гэсэн заалт юм.
"Украины дайн бидэнд байлдах чадвартай байх шаардлагатайг харуулсан. Харин Япон үүнд хараахан бэлэн болоогүй байна" гэж Японы Агаарын өөрийгөө хамгаалах хүчний тэтгэвэрт гарсан генерал Тошимичи Нагаява хэлснийг орон нутгийн хэвлэлүүд иш татав.
Японы Батлан хамгаалахын сайд Ясуказу Хамада арванхоёрдугаар сарын эхээр тус улсын Сангийн сайдтай хамтран ирэх таван жилд улс орны батлан хамгаалах зардлыг хоёр дахин нэмэгдүүлж, ДНБ-ий хоёр хувьд хүргэх арга замыг хайж олохыг даалгасан гэж мэдэгджээ.
Японы эдийн засгийн цар хүрээг харгалзан үзвэл энэ нь тус улсын цэргийн зардлын хэмжээгээр АНУ, Хятадын ард 3-р байранд шууд оруулах боломжтой.
Нэмж дурдахад, төлөвлөгөөнд шаардлагатай бол болзошгүй дайсны хөөргөх талбайг урьдчилан устгах чадвартай алсын тусгалын пуужин АНУ-аас худалдаж авахаар тусгасан.
Тус баримт бичигт кибер аюулаас хамгаалах асуудалд онцгой анхаарал хандуулсан. "Харамсалтай нь манай хөрш зэргэлдээ орнуудын дунд цөмийн чадавхиа нэмэгдүүлж, цэргийн хүчээ эрчимтэй хөгжүүлж, статус кво-г дангаараа хүчээр өөрчлөхийг оролдож байгаа улсууд байна" гэж Японы Ерөнхий сайд тайлбарлав.
Төлөвлөгөөтэй танилцаж амжсан Франс Пресс агентлагийн мэдээлснээр, Хятад улсыг энэхүү баримт бичигт "Японы энх тайван, тогтвортой байдалд заналхийлж буй стратегийн хамгийн том аюул" гэж тодорхойлсон байна.
Ерөнхий сайд Фумио Кишидагийн засгийн газар Орос улс Украин руу довтолсноор Хятадыг Тайвань руу дайрч, ойролцоох Японы арлуудад заналхийлж, дэвшилтэт хагас дамжуулагчийн тээвэрлэлтийг зогсоож, Ойрхи Дорнодын нефтийн далайн замыг хааж магадгүй байх жишиг тогтлоо гэж эмээж байна. Харин Хятадаас Японд суугаа элчин сайдын яам үүнд дургүйцлээ илэрхийлж, Токиог Бээжингийн цэргийн үйл ажиллагааны талаар худал мэдээлэл тараасан гэж буруутгажээ.
Японы эрх баригчдын санаа зовоох бас нэг шалтгаан нь Хойд Солонгосын пуужингийн туршилт юм. Сүүлийн гурван сарын хугацаанд Пхеньян таван пуужин харвасны дотор Японы нутаг дэвсгэр дээгүүр баллистик пуужин харвасан нь сүүлийн таван жилд гараагүй байсан юм.
Оросууд Украин руу довтолсон нь "дэлхийн дэг журмын үндсийг ганхуулсан хүч хэрэглэхийн эсрэг хуулийг ноцтой зөрчсөн үйлдэл" гэж уг баримт бичигт тодорхойлсон байна.
2013 онд баталсан стратегийн өмнөх хувилбарт Орос, Хятад хоёр хоёулаа Токиогийн стратегийн түншүүд гэж дурдагдаж байсан юм.
Эх сурвалж: ВВС
