"Өмнөд Солонгос улсад ажиллах хүсэлтэй 18-39 насны иргэдийн бүртгэл 190 мянгад хүрч сүүлдээ сервер нь гацав".Энэ бол Монголын Засгийн Газрыг ямар ажиллаж байгаа вэ гэх ажлын үнэлгээ юм. Сервер гацсан учраас энэ тавдугаар сард дахин бүртгэл хийх юм байна. Харь улсад "Боолын хөдөлмөр" хийх гэж байна хэмээн бид цэцэрхсэн ч тэр боолын хөдөлмөр нь манай улсын жирийн иргэдийн авдаг цалинг хэд дахин нугална. Солонгост нэг үйлдвэрт хувиарлагдаад 2 саяын цалин авлаа гэхэд л монгол мөнгөөр 4 сая хол илүү давна. Гэтэл Монголд 4 саяын цалинтай иргэд хэд байгаа билээ. Өнгөрсөн сард залуучууд "Монголдоо сайхан амьдаръя" уриатай жагсаал хийсэн. Залуучууд Монголдоо сайхан амьдрахыг хүсэж байгаа ч тэр боломжийг нь Улстөрчид хулгайлсаар байгаа нь Үндэсний эмгэнэл болоод байна. ЖДҮ, Хөгжлийн банкны хэрэг гээд олон хэрэг ар ардаасаа цуварсаар байгаа ч энэ хэрэгт үйлдсэн хэргээ хүлээгээд ял авч буй улстөрч сайд дарга нар алга.
Улсын Ерөнхий ПРОКУРОР нь эдгээр хэргүүдийг шалгуулахаар оруулж ирдэг ч УИХ-ын өндөр хана хэрмийг давж чаддаггүй нь гашуун үнэн. Тиймээс залуучууд гадаад улсыг зорих ганцхан хүсэлтэй болчихоод байгаа юм. Хэрвээ ВИЗ хэмээх саад байгаагүй бол Монгол улсад хүн үлдэхгүй нь тодорхой. 18-аас доош насны сурагчид, 40-өөс дээш насны иргэд, 60-аас дээш насны ахмадууд, тэгээд Сайд дарга нар, төрийн нүсэр албаныхан нь л үлдэх бизээ. Тэгээд засаг төр нь халамж тараагаад, гадаад улсаас өр тавиад, тэрийгээ өөрсдөө хулгайлаад үлдэх нь тодорхой. Гадаадад ажилласан залуус нь эргээд эх орондоо ирье гэтэл МОНГОЛ улс нь өрийн хавханд ороод газар нутгаа, тусгаар тогтнолтойгоо алдаад сууж байх байлгүй.Ийм л эмгэнэлт хувь заяа биднийг хүлээж байна. Хоёрхон жилийн дараа 2024 онд УИХ-ын сонгууль болно. Улс төрчид намууд нь юу гэж худлаа амлаж, ард түмнээ яаж хуурах бол гэхээс яс хавтайна. 2024 онд ухаантайхан байхсан даа Монголын ард түмэн минь
