Эрхүү мужийн Ангарск хотын газрын тос боловсруулах үйлдвэрт дэлбэрэлт болж, хүчтэй гал гарсны улмаас хоёр хүн амиа алдаж, таван хүн шархаджээ.
Дэлбэрэлт маш хүчтэй байсан тул геофизикийн алба газар хөдлөлтийг бүртгэжээ. Энэ хэрэг "Роснефть"-ийн нэг хэсэг болох Зүүн Сибирийн хамгийн том үйлдвэрт болсон байна.
Ангарскийн нефть химийн компанийн үйлдвэрийн талбайн технологийн хэсэгт гал орон нутгийн цагаар 11.00 цагийн орчимд гарч 2.5 мянган ам метр талбайг хамарсан байна. Одоогоор галыг бүрэн унтраажээ.
Эрхүү мужийн Амбан захирагч Игорь Кобзевын хэлснээр газрын тос боловсруулах үйлдвэрт болсон дэлбэрэлтийн үеэр газар хөдлөлт бүртгэгдсэн бөгөөд нутгийн оршин суугчид үүнийг газар хөдлөлт гэж андуурчээ.
Онцгой байдлын яамны мэдээлснээр ослын урьдчилсан шалтгаан нь технологийн үйлдвэрийн системүүдийн хий бохирдсонтой холбоотой гэжээ. Мөн Мөрдөн байцаах хороо үйлдвэрлэлийн аюулгүй байдлын шаардлагыг зөрчсөн гэсэн үндэслэлээр эрүүгийн хэрэг үүсгэсэн.
Сануулахад, үүнээс өмнө арваннэгдүгээр сарын 27-нд Ангарск дахь нефть боловсруулах үйлдвэрийн талбайн нутаг дэвсгэрт гал гарсан юм. Үүний улмаас дулааны солилцооны технологийн суурилуулалт шатаж, гал тоомоохон талбайг эзэлсэн юм. Харин ослын улмаас тухайн үед хүн бэртэж гэмтээгүй байна.
Ангарскийн нефть химийн үйлдвэр нь Роснефть компанийн нэг хэсэг бөгөөд газрын тосны бүтээгдэхүүн боловсруулах, үйлдвэрлэх Зүүн Сибирийн хамгийн том үйлдвэр юм. Тус үйлдвэр Орос улсын газрын тос боловсруулах 10 том үйлдвэрийн нэг бөгөөд жилд 9 сая тонн орчим газрын тос боловсруулдаг.
Эх сурвалж: ВВС
