Жихадист "Лалын улс" бүлэглэл өөрийн удирдагч Абу аль-Хасан аль-Курайши нас барсныг зарлав.
Тус бүлэглэлийн төлөөлөгч аль-Курайшийг "Бурхны дайснууд" гэж нэрлэсэн хүмүүстэй хийсэн тулалдаанд амь үрэгдсэн гэсэн аудио мессежийг нийтэлсэн боловч өөр дэлгэрэнгүй мэдээлэл өгөөгүй байна. Тэр 45 настай байсан.
Мөн тус бүлэглэл ISIS-ын шинэ удирдагчаар Абу аль-Хусейни аль-Курайши сонгогдсон гэж мэдэгджээ. Одоогоор түүний талаархи мэдээлэл хомс байна.
Сирийн баруун өмнөд хэсэгт орших Дераа мужид Сирийн чөлөөт армитай (жихадистууд болон ерөнхийлөгч Башар аль-Асадын засгийн газрын хүчнийхэнтэй тулалддаг бүлэг) хийсэн ажиллагааны үеэр ISIS-ын удирдагч амь үрэгдснийг АНУ баталлаа. Пентагоны мэдэгдэлд дурдсанаар Америкийн цэргүүд энэ ажиллагаанд оролцоогүй аж.
АНУ-ын Ерөнхийлөгчийн тамгын газрын хэвлэлийн төлөөлөгч Жон Кирби “Исламын улс” бүлэглэлийн удирдагч амь үрэгдсэн мэдээг баяртайгаар хүлээн авсан тухайгаа хэлжээ.
Энэ оны гуравдугаар сард тус бүлэглэлийн өмнөх удирдагч Сирийн зүүн хойд нутагт алагдсаны дараа Абу аль-Хасан аль-Курайши ISIS-ын удирдагчийн үүрэг гүйцэтгэх болсон юм.
ISIS-ын террорист "Халифатын вант улс" нь нэгэн цагт Иракийн зүүн хэсгээс баруун Сири хүртэлх 88,000 хавтгай дөрвөлжин километр талбайг хамарч байсан бөгөөд найман сая орчим хүн ам террористуудын буулган дор амьдарч байжээ.
2017, 2018 онд ISIS эхлээд Иракт, дараа нь Сирид тулалдааны талбарт ялагдсан. Гэсэн хэдий ч тус бүлэглэл Афганистаны хойд хэсгийн Кундуз хотын шийтүүдийн сүмийг бөмбөгдсөн гэх мэт халдлагын хариуцлагыг хүлээсээр байна. Уг дэлбэрэлтийн улмаас 50 гаруй хүн амиа алдсан нь АНУ-ын цэргийг тус улсаас гаргаснаас хойшхи хамгийн том террорист халдлага болсон юм.
Эх сурвалж: ВВС