Тяньаньмэний талбай дахь эсэргүүцлийн жагсаалыг цус урсган дарсны дараа засгийн эрхэнд гарсан Хятадын удирдагч асан Зян Зэмин 96 насандаа таалал төгссөн тухай тус улсын хэвлэлүүд мэдээлжээ.
Түүнийг лхагва гаригийн үдээс хойш нас барсан гэж Синьхуа агентлаг мэдээлэв.
Зян Зэмин 1989-2002 онд Хятадын Коммунист намын Ерөнхий нарийн бичгийн дарга, 1993-2003 онд БНХАУ-ын даргаар ажиллаж байсан.
Зян Зэмин залгамжлагч Ху Жинтаод эрх мэдлээ шилжүүлэх үед Хятад улс эдийн засгийн өсөлтөөрөө дэлхийд тэргүүлэгч болсон байв.
Хятадын Улс төрийн товчоо ардчиллын төлөөх хөдөлгөөнтэй тэмцсэний дараа өөрийн эгнээн дэх либералчлалыг дэмжигчдээс ангижирчээ. Тухайн үед тус улсын хамгийн дээд эрх мэдлийг эзэмшиж байсан Дэн Сяопинд үнэнч, тэр үед цуст үйл явдалтай шууд холбоогүй удирдагч хэрэгтэй байв.
Харин тэрхүү сонголт нь тухайн үед Шанхай хотын намын байгууллагыг удирдаж, хүчирхийлэлгүйгээр хотыг хяналтандаа байлгаж чадсан Зян Зэмин дээр буусан юм.
БНХАУ-ын ирээдүйн тэргүүн 1926 оны 8-р сарын 17-нд Янжоу хотод сэхээтний гэр бүлд төржээ. Түүний өвөө нь Хятадын уламжлалт анагаах ухааны мэргэжилтэн байсан бөгөөд уран зураг, уран бичлэгт дуртай байжээ. Харин аав нь шүлэг бичдэг, Японы эсрэг дайны үеэр 28 настайдаа нас барсан.
Зян Зэмин оюутан байхдаа 1946 онд коммунист намд нууцаар элссэн. Шанхай хотын Тээвэр, харилцааны их сургуулийг цахилгааны инженер мэргэжлээр төгссөн. 30 жил жирийн инженерээс Цахим үйлдвэрийн сайд болтлоо өссөн.
1955 онд Москвагийн ЗИС автомашины үйлдвэрт дөрвөн сар сурч, орос хэл, тухайн үеийн дууг нэлээд сайн сурсан гэдэг. 1998 онд Москвад айлчлах үеэрээ хуучин танилуудтайгаа уулзалт зохион байгуулж байжээ.
"Соёлын хувьсгал"-ын жилүүдэд тэр "хөдөлмөрийн дахин боловсрол"-д хамрагдсан боловч хөдөө орон нутагт албадан гаргахгүйгээр, харин албан тушаал бууруулж байжээ.
1985 онд Шанхай хотын дарга, хоёр жилийн дараа хотын намын хорооны нэгдүгээр нарийн бичгийн даргаар томилогдсон.
Эх сурвалж: ВВС