Украины Зэвсэгт хүчний жанжин штаб "Укроборонпром" компаниас олноор үйлдвэрлэсэн 152 мм калибрын шинэ их бууны сумыг танилцуулжээ.
Сумны бүрхүүл дээр "Харьков ба Львовын төлөө", "Балаклея ба Изюмний төлөө" гэхчлэн бичжээ.
Түүнчлэн үйлдвэрлэгч “Укроборонпром” компани модон хайрцагт хийсэн сумыг харуулсан видеог нийтэлсэн байна.
Украины урлаг соёлын болон спортын гэхчлэн алдартнуудын дунд флашмоб эхэлж, 152 мм-ийн их бууны суман дээр гарын үсэг зурж, Оросын цэргийнхэнд зориулсан "сайн сайхны ерөөл"-өө илэрхийлсэн байна.
Дашрамд сануулахад Украинд цэрэг зэвсгийн тусламж үзүүлж байгаа Барууны орнууд болон АНУ-ын тухайд цаашид үргэлжлүүлэн нийлүүлэх артиллерийн сумны нөөц хомс болсон тухай мэдээлж буй. Ийм цаг үед Украинчууд өөрсөдөө сум үйлдвэрлэж эхэлсэн нь дайны явцыг өөрчлөхөд ихээхэн түлхэц болно гэж шинжээчид үзэж байна.
Харин Барууны орнуудаас нийлүүлдэг орчин үеийн их бууны системд зориулсан 155 мм-ийн сумыг Украин үйлдвэрлэхээр төлөвлөөгүй гэж тус улсын Батлан хамгаалахын сайд Алексей Резников мэдэгджээ. Тэд ийм төрлийн сумыг түншүүдээс хүлээн авах төлөвлөж байна.
Эх сурвалж: ВВС