УИХ-ын чуулганы нэгдсэн хуралдаан өнөөдөр 14.00 цагаас эхэллээ. Чуулганы хуралдааны эхэнд 2022 оны төсвийн тодотголтын хуулийн төслийн эцсийн хэлэлцүүлгийг хийсэн юм.
Энэ үеэр УИХ-ын гишүүн М.Оюунчимэг өчигдөр олон нийтийн дургүйцлийг төрүүлсэн үгнийхээ талаар тайлбар хийлээ.
Тэрбээр хэлэхдээ "Цэцэрлэгийн асуудал зоригтой оруулж ирсэнд юуны өмнө талархаж байна. Мөн салаа утгатай үгнээс болж буруу ойлголт төрүүлсэндээ хүлцэл өчье. Айл болгоны хашаа руу орох жорлон гэж Төсвийн байнгын хорооны дарга Ч.Хүрэлбаатар буруу ойлголт төрүүлсэн. Уг нь манай намын мөрийн хөтөлбөрт тусгагдсан "Хэсэгчилсэн дэд бүтэц буюу дундын шугам барьж" асуудлыг шийдвэрлэхийн хүрээнд Чингэлтэй дүүрэгт 100 гаруй айл яндан, нүхэн жорлонгоосоо салсан. Айл өрхийн хашаанд биш гудамж руу татах дундын шугамын төсөв Хотын төсөвт суудгаараа суугаад явах хэрэгтэй гэдэг санаагаа илэрхийлсэн. энэ бол хэрэгтэй зүйл" хэмээсэн юм.