Чөлөөлөгдсөн Херсон хот ус, цахилгаан, хөдөлгөөнт холбоогүй амьдарч байгаа ч эргэж ирсний баяр баясгалан нь хотын оршин суугчдад тохиолдож буй бүх таагүй байдлыг тэвчихэд хүргэж байна. BBC-ийн сэтгүүлч Дмитрий Власов төрөлх хотдоо ажлаар бус харин дайн эхэлснээс хойш уулзаагүй эцэг эх, гэр бүлтэйгээ уулзахаар очжээ.
Дмитрий Власов Херсоноос гаралтай ч сүүлийн жилүүдэд Киевт ажиллаж амьдарч байгаа юм. Дайн эхлэхэд тэрээр нийслэлд байсан бөгөөд төрөл төрөгсөд нь Херсон, Чернобаевкад байв.
Тэрбээр төрөлх хотдоо очсон тухайгаа "Би одоо Херсонд, нам гүм газар байна. Эргэн тойрноо анзаарч харахад энд дор хаяж 10-аас цөөнгүй удаагийн цохилт өгсөн гэмээр байна гэжээ.
Дмитрийгийн хэлснээр хоёрдугаар сарын 24-нд эхэлсэн довтолгоо нь оршин суугчдыг бүрэн цочирдуулсан юм. Херсон муж нь Крымын хажууд байрладаг хэдий ч түүхэндээ энэ хотод цэргийн ангиуд байгаагүй, ерөнхийдөө бол анхаарал татах газар биш байв.
Иргэд Днеперээс усаа зөөж байна
Гуравдугаар сард Украины далбаатай жагсаал Херсон хотод болсон. Оросын арми хариуд нь жагсагчдыг баривчилж, идэвхтнүүд сураг алдарсан. Тэр цагаас хойш хотын оршин суугчид зүгээр л гэртээ бүгэж эхэлсэн.
Чөлөөлөгдсөн Херсоны одоогийн хамгийн том зовлон бол гар утас, эрчим хүч, усны дутагдал юм. Та мөнгөө авч чадахгүй, мобайл банк байхгүй, бид зүгээр л цаг хугацааг ухрааж орхисон" гэж Дмитрий хэлэв. Хамтран ажиллагсад, найз нөхөдтэйгээ холбоо тогтоохын тулд эхний өдрүүдэд Николаев мужийн чиглэлд явах нь илүү хялбар байсан.
Оросууд явахдаа хотын усны цамхаг болон бусад хангамжийн дэд бүтцийн байгууламжуудыг дэлбэлсэн. 200 метрийн өндөр телевизийн цамхагыг мөн явахынхаа өмнө дэлбэлсэн.
Гэр ахуйн хэрэглээний зүйлсээс зөвхөн хий байна. Хот даяар цахилгаан, ус байхгүй. Хүмүүс сав бариад Днепр мөрний эрэг рүү эгц уруудан алхаж, голоос ус зөөж амьжиргаагаа залгуулж байна.
Херсон дахь дэлгүүрүүд хараахан нээгдээгүй байна. Цахилгаан эрчим хүчгүйгээс хөргөгч, кассын машин байхгүй. Тэгээд ч одоогоор зарж худалдах онцгой зүйл байхгүй. Урьд нь хангамж ирдэг байсан бүс нутгийн хойд хэсгийн гүүрнүүд эвдэрсэн.
Гудамжинд иргэд өөрсдийн боломж санаачлагаараа худалдаа арилжаа хийх нь хүмүүс ямар нэгэн зүйл худалдаж авах цорын ганц арга зам болж байна. Өмнөх өдөр нь Дмитрийгийн гэр бүлийнхэн тайван цагт бол авах байтугай тоож ч харахааргүй тийм чанар муутай мах худалдаж авчээ.Олдож байгаа нь тийм.
Гэвч түүний хэлснээр бүх зүйл сайжирч байна. Цахилгаан үүсгүүрүүд ирж, НҮБ хүмүүнлэгийн хүнсний тусламжийг иргэдэд хүргэж, шуудангийн салбарууд ажиллаж эхэлж байна. Нөхцөл байдал өдөр ирэх тусам арай дээрдсээр байна.
Хотын төвд хоол хүнс, Starlink терминалууд, Украины үүрэн холбооны операторуудын түр цамхагууд түрүүчээсээ бий болж байна. Оршин суугчид хэдэн сарын турш хамаатан садантайгаа хэл чимээ авалцаж чадаагүй учир харилцах бүх боломжийг ашиглахыг хичээж байна.
Дайны энэ бүх саруудад Херсон хотын оршин суугчид фронт дахь нөхцөл байдал, бусад мэдээний талаар юу ч мэдэхгүй байв. Одоо ч гэсэн мэдээлэл авах гол арга бол гудамжны яриа хэвээр байна. Ус хаана байна, хоол хүнс зарж байгаа газар байна уу, SIM карттай нээлттэй дэлгүүр байна уу... гэхчлэн
Эх сурвалж: ВВС-ээс товчлов