Эрдэнэбүрэний усан цахилгаан станц барих газрын хилийн зааг дотор амьдардаг, тус төслийн нөлөөлөлд өртсөн орон нутгийн иргэн тус бүрд нэг удаа 30 сая төгрөгийн нөхөх олговор олгох хуулийн төслийг өргөн барилаа.
УИХ-ын гишүүн Д.Адьшаа: Эрдэнэбүрэнгийн УЦС-ын нөлөөллийн бүсэд 300 гаруй өрхийн 1500 иргэн бий. Эдгээр иргэдэд нэг удаагийн мөнгөн тусламж буюу иргэн тус бүрд нэг удаа 30 сая төгрөг олгох хуулийн төслийг өргөн барилаа. Үндэсний эрх ашигт хамаатай энэ төслийг урагшуулах ёстой. Гэхдээ нөлөөллийн бүсэд байгаа ард иргэдийн Үндсэн хуульд заасан эрхийг хангаж өгөх ёстой. Тус санхүүжилтийг улсын төсвөөс олгох боломжгүй учир Эрдэнэбүрэнгийн УЦС-ын төслийн санхүүжилтэд зориулсан 288 сая ам.доллароос зарцуулах асуудлыг шийдэх ёстой. Эрдэнэбүрэнгийн цахилгаан станцын төслийг урагшуулах бодлого баримталж байвал УИХ тус хуулийн төслийг дэмжих ёстой. Улс орон даяар бараа бүтээгдэхүүний үнэ өссөн, нөлөөллийн бүсэд буй тухайн иргэд өвөлжөө, хаваржаагаа сольсон гэх нөхцөл байдлыг харгалзан үзэн иргэн тус бүрд 30 сая төгрөг гэсэн тооцоолол гаргасан.
