Украины Ерөнхийлөгчийн хэвлэлийн нарийн бичгийн дарга Сергей Никифоров мэдэгдэхдээ Владимир Зеленский арваннэгдүгээр сарын 15-16-нд Балид болох “Их 20”-ийн дээд хэмжээний уулзалтад оролцоно гэдгийг хэлэв.
"Мэдээж ямар нэг хэлбэрээр Владимир Зеленский G20-ийн дээд хэмжээний уулзалтад оролцоно. Би үүнээс илүү зүйлийг хэлж чадахгүй" гэж Никифоров ярилцлагадаа дурджээ. Энэ нь магадгүй, онлайн формат буюу зайнаас цахимаар оролцох боломжийг хэлж буй хэрэг хэмээн тэр нэмж хэлэв.
ОХУ-ын бүрэн хэмжээний түрэмгийлэл эхэлснээс хойш Зеленский Украиныг нэг ч өдөр орхиогүй байгаа юм.
G20-ийн дээд хэмжээний уулзалт нь Орос, Украины ерөнхийлөгчид нэг танхимд байх онцгой тохиолдол байж болох юм. Тиймээс ч хоёр Ерөнхийлөгчийн Балид ирэх нь хараахан батлагдаагүй байгаа шалтгаануудын нэг нь энэ байж магадгүй юм.
Харин ОХУ-ын тухайд "Дээд хэмжээний уулзалтад оролцох шийдвэр хараахан гараагүй байна гэж Владимир Путин өөрөө 10-р сарын 31-нд мэдэгдсэн. Гэхдээ энэ талаарх эцсийн шийдвэрийг энэ долоо хоногт зарлана гэж түүний хэвлэлийн төлөөлөгч Дмитрий Песков хоёр хоногийн өмнө амласан.
"Их-20"-ын уулзалтыг зохион байгуулагч Индонезийн Ерөнхийлөгч Жоко Видодо өчигдөр Путин дээд хэмжээний уулзалтад ирэхгүй гэж мэдэгджээ. Харин өнөөдөр Видодо Bloomberg-т өгсөн ярилцлагадаа “нөхцөл байдал бүрдвэл Путин, Зеленский хоёр ирэх боломжтой” гэж мэдэгджээ.
11-р сарын 3-нд Зеленский хэрэв Путин дээд хэмжээний уулзалтад оролцвол өөрөө ч, Украины төлөөлөгч ч оролцохгүй гэж мэдэгдээд байгаа юм.
Эх сурвалж ВВС
