Путины охин Мария Воронцова
"Эхо Москвы" радиогийн ерөнхий редактор Ерөнхийлөгч Путины охин Мария Воронцовагийн зургийг хувийн блогтоо нийтэлжээ. Зураг дээр тэрбээр гоёмсог цэнхэр костюм өмсч, энгэрийн гоёмсог зүүлт, сувдан ээмэг зүүжээ. Зургийн дор "Ерөнхийлөгчийн ууган охин Мария Воронцова Санкт-Петербургт болсон эмэгтэйчүүдийн форумд үг хэлсэн" гэж тайлбар бичжээ. Ерөнхийлөгчийн охид тэр бүр олны нүдэнд өртөөд байдаггүй.
Владимир Путин гэр бүлийнхээ тухай ярих дургүй. Охидынх нь хувийн амьдрал нууцлаг талдаа. Ерөнхийлөгчийн өв залгамжлагчид Мария Воронцова, Катерина Тихонова нар гэж олон нийт таамаглахаас нэг их хэтэрдэггүй.
Ерөнхийлөгч Путин "Охидууд маань энгийн амьдралаар амьдардаг. Би үүнийг онцлон хэлэхийг хүсч байна. Охид маань ухаалаг, хүмүүжилтэй, биеэ их барьдаг хэрнээ өөрийгөө хүндэлдэг. Би үүнд маш их баяртай байдаг” гэж төрийн тэргүүн арван жилийн өмнө хэлж байсан.
Дашрамд хэлэхэд, Мария, Катерина нар үнэхээр гайхалтай сайн боловстролтой гэдгээрээ "гайхуулж" чадна.
Тодруулбал, Катерина Тихонова физик-математикийн шинжлэх ухааны эрдэмтэн, Москвагийн Улсын Их Сургуулийн Шинжлэх ухаан, техникийн төвийг байгуулах ажилд оролцож байна.
Харин Мария Воронцова бол ЭМЯ-ны Дотоод шүүрэл судлалын үндэсний анагаах ухааны судалгааны төвийн тэргүүлэх судлаач, Оросын шинжлэх ухааныг дэмжих нийгэмлэгийн Тэргүүлэгч гишүүн юм.
Санкт-Петербургт болсон эмэгтэйчүүдийн форумд Мария "ДНХ-г судлах нь өөрийгөө танин мэдэх арга зам" гэсэн судлаачдын хуралдааны модератороор ажиллажээ. Тэрбээр "Генетик нь хүчирхэг хэрэгсэл болохын хувьд бидний эрүүл мэнд, түүнчлэн ирээдүйн хүүхдүүдийн эрүүл мэндэд илүү ухамсартай хандахад тусална" гэж форумын үеэр хэлжээ.
Эх сурвалж: News-sphere.com
