Орос улс Севастопольд болсон террорист халдлагын дараа түр зогсоосон үр тарианы хэлэлцээрийн хэрэгжилтийг сэргээв. Энэ тухай Оросын Батлан хамгаалах яам мэдээллээ.
Тус яамны мэдээлснээр Оросын тал Украинаас бичгээр баталгаа авсан, Киев үр тарианы коридорыг Москвагийн эсрэг цэргийн ажиллагаанд ашиглахгүй гэж амласан гэжээ.
НҮБ болон Туркийн зуучлалын тусламжтайгаар хэлэлцээрт эргэн орох боломжтой гэж Батлан хамгаалах яам тодотгоод "Оросын Холбооны тал одоогоор хүлээн авсан баталгааг хангалттай гэж үзэж, гэрээний хэрэгжилтийг үргэлжлүүлж байна" гэж мэдэгдэв.
Үүний өмнө ОХУ-ын Ерөнхийлөгч Владимир Путин Туркийн Ерөнхийлөгч Ражеп Тайип Эрдогантай ярилцахдаа үр тарианы хэлэлцээрт Москвагийн оролцоог сэргээх нөхцөлийг нэрлэжээ. Түүний хэлснээр, Киев аюулгүй байдлын баталгаа гаргаж, гэрээний заалтыг цэргийн зорилгоор ашиглахаас татгалзах ёстой гэдгийг онцолжээ.
Эргэн сануулахад аравдугаар сарын 29-нд Севастополь дахь Хар тэнгисийн флотын хөлөг онгоцууд руу дроноор халдсаны дараа ОХУ хэлэлцээрийг түр зогсоосноо мэдэгдсэн юм. Уг цохилтыг Украины зэвсэгт хүчин хийсэн гэж Батлан хамгаалах яам мэдэгдээд халдлагад Их Британи оролцсон гэж буруутгаж, энэ үйл явдлыг террорист ажиллагаа гэж нэрлэжээ.
Эх сурвалж: Лента.ру
