НҮБ, Туркийн зуучлалаар байгуулсан Украины өмнөд боомтуудын хүнсний экспортын гацааг арилгах гэрээнд ОХУ оролцохоо "тодорхойгүй хугацаагаар" зогсоож байна гэж Оросын хоёр яам мэдэгдэв. Ингэх болсон шалтгаанаа тэд "Үр тарианы коридор"-ын хэсэгт үүрэг гүйцэтгэж байсан ОХУ-ын хөлөг онгоцуудад агаар, далай тэнгисээс их хэмжээний цохилт өгөх болсон хэмээн тайлбарлажээ.
ОХУ-ын БХЯ болон ГХЯ-аас гаргасан мэдэгдэлд "өнгөрсөн бямба гарагт Украины зэвсэгт хүчин хүмүүнлэгийн коридорын халхавч дор Оросын Севастополь дахь тэнгисийн цэргийн баазын хөлөг онгоцууд болон Хар тэнгисийн флотын дэд бүтцэд нисгэгчгүй агаарын тээврийн хэрэгсэл ашиглан том цохилтыг эхлүүлэв" гэжээ.
Үүний зэрэгцээ Оросын ГХЯ-ны мэдээлснээр уг халдлагыг "Их Британийн мэргэжилтнүүдээр удирдуулсан Украины зэвсэгт хүчин" үйлдсэн байна.
Одоо ОХУ далайн коридорын аюулгүй байдлыг хангаж чадахгүй тул нэг талын санаачлагаар хааж байна гэж Москва тодотгов. ОХУ-ын энэ мэдэгдлээс хэдхэн цагийн дараа НҮБ-д суугаа ОХУ-ын төлөөлөгчийн орлогч Дмитрий Полянский твиттер хуудсаараа "Орос улс хэлэлцээрт оролцохоо түдгэлзүүлсэн тухай НҮБ-ын Ерөнхий нарийн бичгийн даргад албан ёсоор мэдэгдэж, энэ асуудлаар НҮБ-ын Аюулгүйн Зөвлөлийг 10-р сарын 31-ний Даваа гарагт /өнөөдөр/ хуралдуулахыг хүссэн" гэв.
Украин Оросын мэдэгдлийг шантааж гэж буруутгав
"Бүх зүйлд Оросын шантааж Цөмийн шантааж, эрчим хүч, хоол хүнс ... дэлхий нийтийн хөх инээдийг хүргэсэн"бохир бөмбөг"-ийн тухай зохиол. Өөрсдийн байгууламжид хийсэн зохиомол террорист халдлага ... бүх зүйл хэтэрхий энгийн бөгөөд урьдчилан таамаглах боломжтой" гэж Зеленскийн ажлын албаны дарга Андрей Ермак твиттертээ бичжээ.
Мөн Украины Гадаад хэргийн сайд Дмитрий Кулеба хэлэлцээрт эргэн орохын тулд Орост шахалт үзүүлэхийг олон улсын хамтын нийгэмлэгт уриалав.
Ерөнхийлөгч Владимир Зеленскийн хэвлэлийн нарийн бичгийн дарга Сергей Никифоров хэлэхдээ, Украин "үр тарианы гэрээ"-нд гарын үсэг зурсан Турк болон НҮБ-ын хариу үйлдлийг хүлээж байна. Тэрбээр Украины телевизэд өгсөн тайлбартаа "Украин Оростой ямар ч гэрээ байгуулаагүй. Тиймээс гарын үсэг зурсан талуудын хариу үйлдлийг хүлээж байна" гэж тодотгов.
"Үр тарианы гэрээ" гэж юу вэ
7-р сарын 22-нд НҮБ-ын зуучлалаар Украйн, Орос, Турк улс Стамбулд хэлэлцээ хийж, Украйны үр тарианы экспортын хориг саадыг арилгахаар тохиролцсон юм.
Украин улс Турк болон НҮБ-тай тусдаа гэрээ байгуулсан бөгөөд тэдний өмнө үүрэг хүлээдэг. Орос Турк болон НҮБ-тай толин тусгалын гэрээ байгуулсан.
Үүнээс хойш НҮБ-ын мэдээлснээр Украины өмнөд боомтуудаас 9 сая гаруй тонн хүнсний бүтээгдэхүүнийг Туркийн хяналт шалгалтаар дэлхийн янз бүрийн улс орнууд руу илгээсэн байна. "Үр тарианы гэрээ" нь 100 сая хүнийг өлсгөлөнгөөс аварсан гэж НҮБ мэдэгдээд байгаа юм.
Эх сурвалж: ВВС
