БНСУ-ын нийслэл Сөүл хотод Сүнсний баяр тэмдэглэж байх үеэр үүссэн шахцалдааны улмаас 151 хүн амиа алдсан харамсалтай явдал гарсантай холбогдуулан тус улсын Ерөнхийлөгч Юн Сок Ёл орон даяар гашуудал зарлалаа.Юн Сок Ёл ард түмэндээ хандан хэлсэн үгэндээ, “туйлын харамсалтай явдал болсон гээд бямба гарагт тохиосон шиг ийм эмгэнэлтэй явдал дахин хэзээ ч бүү гараасай” гэж мэдэгдсэн байна.“Ард түмний амь нас, аюулгүй байдлыг хариуцдаг Ерөнхийлөгчийн хувьд миний зүрх сэтгэл шимширч, эмгэнэн гашуудаж байна. Засгийн газар өнөөдрөөс эхлэн болсон хэрэг явдлыг бүрэн хяналтдаа авах хүртэлх хугацаанд орон даяар гашуудал зарлаж, үүнтэй холбогдуулан авч хэрэгжүүлэх арга хэмжээг эн тэргүүнд тавина” гэж хэлжээ.Мөн Юн Сок Ёл нас барагсдын ар гэрийнхэнд гүн эмгэнэл илэрхийлж, гэмтэж бэртсэн хүмүүст түргэн эдгэрэхийг хүссэнээс гадна Засгийн газар оршуулгад бэлдэх ажилд дэмжлэг үзүүлж, өвчтөнүүдийг эмчлэхэд яаралтай тусламжийн үйлчилгээг үзүүлэх болно гэдгийг нэмж хэлсэн байна.“Ослын шалтгааныг тогтоох, түүнтэй төстэй ослоос урьдчилан сэргийлэх нь хамгийн чухал. Иймд бид ослын шалтгааныг сайтар судалж, цаашид ийм төрлийн осол гаргахгүйн тулд сайжруулах алхмуудыг хийнэ” гэж тэрбээр хэлсэн үгэндээ цохон тэмдэглэжээ.Өнөө өглөөний 9:00 цагийн байдлаар, шахцалдааны улмаас амиа алдагсдын тоо 151-д хүрсний 19 нь гадаадын иргэд байгаагаас гадна 82 хүн гэмтэж бэртсэний 19 нь хүнд бэртэл авсан гэж холбогдох албаны төлөөлөгч мэдээлжээ. Амиа алдсан хүмүүсийн 97 нь эмэгтэй, 54 нь эрэгтэй хүмүүс байжээ. Мөн 270 гаруй хүн сураггүй байгаа гэсэн мэдээ бий.
