УИХ-ын чуулганы нэгдсэн хуралдаан үргэлжилж байна. Хуралдаанаар “Төрөөс мөнгөний бодлогын талаар 2023 онд баримтлах үндсэн чиглэл батлах тухай” Улсын Их Хурлын тогтоолын төслийг хэлэлцэж байна.
УИХ-ын гишүүн Т.Доржханд “Төсөв нийт эдийн засгийн 40 хувь шүү. Ийм орон зайд мөнгөний бодлого явуулах боломж байхгүй. Одоо энийг төв банкныхан бол дотроо яриад байгаа гадагшаа гаргаж чадахгүй байгаа шүү.
Их хурлын гишүүдийн анхаарах 2023 оны хамгийн хүндрэлтэй зүйл бол төлбөрийн баланс. Хэрвээ бид бондуудаа төлж чадахгүй бол дефолт зарлана шүү. Энэ тодорхой шүү. Өнөөдөр нийт нөөц чинь 2,5 тэрбум доллар л байгаа. Ирэх жил төлөх дүн чинь 1,3 тэрбум нэмээд Хятадын төв банкны өр 2,5 тэрбум доллар шүү. Тэгэхээр маш хэцүү байгаа. Мөнгөний бодлогын үр дүн амжилттай явуулах ганц л нөхцөл байгаа. Тэр нь бол төсвөө хумих. Өнөөдөр 2,5 их наядын төсвөөр чинь мөнгөний бодлогоо, инфляцаа нэг оронтой тоонд барих ямар ч боломж байхгүй. Долларыг 3500 дээрээ барих ямар ч боломж байхгүй шүү. Бодит байдал энэ. Цаашдаа эдийн засгийнхаа асуудлыг шийдээд явъя аа гэвэл Их Хурлын гишүүд төсөв дээрээ л хатуу байр суурьтай байгаарай. Үгүй бол улсаараа дампуурна шүү. Үүнийг ганц би хэлээд байгаа юм биш. Олон Улсын Байгууллагууд ч хэлж байгаа" гэлээ.
Г.Бүжинлхам
