Өнөөдрийн Засгийн Газрын хуралдаанаар Эрдэнэс- Тавантолгой ХК-тай холбоотой асуудлаар хэлэлцэж онцгой дэглэм тогтоох шийдвэр гаргасан талаар ЗГХЭГ-ын дарга Д.Амарбаясгалан мэдээлэл хийсэн . Тэрбээр Монгол Улсын хувьд төлбөрийн тэнцэлтэй холбоотойгоор валютын нөөцийг нэмэгдүүлэх онцгой арга хэмжээ авах үүрэг чиглэл өгөгдсөн. "Эрдэнэс-Тавантолгой" ХК нь энэ оны төгсгөл гэхэд 500 сая долларыг татан төвлөрүүлэх, Уулын баяжуулах Эрдэнэт үйлдвэрт 300 сая ам долларыг төвлөрүүлэх үүрэг өгөгдсөн байдаг. Үүнтэй холбоотойгоор "Эрдэнэс Тавантолгой" ХК-д Засгийн газрын 362 дугаар тогтоолын хүрээнд 6 сарын хугацаанд онцгой дэглэм тогтоохоор боллоо” гэж мэдэгдсэн юм.
Тэгвэл энэ шийдвэрийн талаар Буянгийн Жагаа гэддэг Б.Жаргалсайхан "Монгол Улсын валютын хомсдол үүсч ам долларын үнэ 4000 төгрөг рүү шааригдаж байгаа билээ. Валют орж ирдэг гол урсгал болох "Эрдэнэс-Тавантолгой" компанийн үйл ажиллагаа доголдож авлага ихээр үүсээд байгаа. Өнөөдрийн байдлаар 580 орчим сая ам.доллар Монгол банкинд тушаасан байдаг. Гэтэл нэг их наяд 860 сая ам.долларын нүүрс гаргаж борлуулсан гэсэн таамаг мэдээг Ч.Хүрэлбаатар мэдэгдээд байгаа юм. "Эрдэнэс-Тавантолгой" компани оны сүүлээр гэхэд 300 сая орчим сая ам.доллар оруулна гэсэн мэдээлэл өгсөн. Энэ валютыг нэмэгдүүлэх, оны эцэс гэхэд 500 сая ам. доллар оруулж ирэх, "Нүүрсний хулгай"-г илчлэх зорилгоор Засгийн газраас Онцгой дэглэм тогтоож бүрэн эрхт төлөөлөгч томилж байгаа юм. Урьдчилан борлуулсан, бартер хийсэн, нууцын зэрэглэлд авагдсан гэрээнүүдийг олон нийтэд ил болгохоор боллоо. Зарим эх сурвалжийн мэдээлж буйгаар 2.6 тэрбум ам.долларын борлуулалт хийгдсэн гэх. Ямартаа ч гол мөнгө олдог, хүнд хэцүү үед улс орныг нуруун дээр үүрч гарсан "Эрдэнэс-Тавантолгой"-н үйл ажиллагаа жигдэрүүлэх зорилгоор онцгой комисс ажилдаа орлоо" хэмээн өөрийн цахим хуудастаа нийтэлжээ.
Харин иргэд бид эрхэм "Онцгой комисс"-ын гишүүд маань "Нүүрсний хулгайчид"-ыг хэрхэн илчлэхийг хүлээж суух л үлдлээ дээ.
Ерөнхий сайд Л.Оюун-Эрдэнэ тэргүүтэй Засгийн газар "Эрдэнэс-Тавантолгой" компаны хулгайчидыг барьж чадах болов уу?
О.Сарантуяа