Амьсгалын замын синцитиал вирусын (RSV) дэгдэлтээс болж АНУ-ын хүүхдийн эмнэлгүүд ачаалал ихтэй байна гэж хэвлэлүүд мэдээлж байна.
Хартфорд дахь Коннектикутын хүүхдийн эмнэлэг сүүлийн хэдэн долоо хоногт амьсгалын замын халдвар үүсгэдэг вирусын нэг төрөл болох RSV-ийн дэгдэлтээс шалтгаалан хүчин чадлынхаа хязгаарыг давчихаад байна гэжээ. Эмч нар одоо нэмэлт өвчтөнүүдийг хүлээн авахын тулд гадаа майхан байрлуулахаар Үндэсний гвард болон Холбооны Онцгой байдлын агентлагтай хэлэлцээр хийж байна.
Коннектикутын Хүүхдийн эрүүл мэндийн төвийн ахлах эмч, доктор Хуан Салазар "Бидэнд насанд хүрэгчдийн тасагт байдаг шиг олон эрчимт эмчилгээний ор байдаггүй гэж тайлбарлав.
Түүний хэлснээр есдүгээр сарын эхээр өвчлөлийн тоо нэмэгдэж, урьд өмнө ажиглагдаж байгаагүй хурдацтай өссөн байна.
Нью Хейвен хүүхдийн эмнэлэгт яаралтай тусламжийн өрөөнд RSV-ийн тохиолдол бараг хоёр дахин нэмэгдэж, 57-аас 106 болж өссөн байна. Өдөр бүр RSV-тэй 30 хүүхэд энд ирж байна. Үүний зэрэгцээ COVID-19-тэй өвчтөнүүдийн яаралтай тусламжийн тасагт өдөрт гурваас илүүгүй хүүхэд хэвтдэг.
Нийслэлийн Колумбия дүүргийн хэд хэдэн эмнэлгүүд RSV-ийн өвчтөнүүдээр дүүрсэн тухай Вашингтон Пост сонинд мэдээлсэн байна.
NBC-ийн мэдээлснээр Калифорниа, Иллинойс, Массачусетс, Хойд Каролина, Род-Айленд мужуудад RSV-ийн дэгдэлтийн улмаас эмнэлгүүд ачаалал ихтэй ажиллаж байна.
Эх сурвалж: РИА новостти
