Барууны үзэл баримтлалтай улс төрийн хүчнүүдийн эвслийн тэргүүн Жоржиа Мелонийг өчигдөр Итали улсын анхны эмэгтэй ерөнхий сайдаар томилжээ.
Италийн Ерөнхийлөгч Сержио Маттарелла орон нутгийн цагаар баасан гаргийн үдэд Ерөнхий сайдыг хүлээн зөвшөөрч маргааш нь тангараг өргөхөөр болов.
Тэрбээр Европын нэгдлийг болон цагаачлалыг эсэргүүцэгч, пост-фашист нам болох Италийн Ахан дүүсийн тэргүүн юм. Өөрөөр хэлбэл Муссолинигийн фашист дэглэмийн хөрсөн дээр байгуулагдсан түүхтэй нам гэгддэг.
Мелонигийн нам есдүгээр сарын 25-нд болсон парламентын сонгуульд ялсан ч засгийн газар байгуулахын тулд бусад намын дэмжлэг авах хэрэгтэй байжээ.
Урьд өмнө нь хэзээ ч засгийн газар байгуулж байгаагүй Италийн Ахан дүүс нам Европын Холбооны гурав дахь том эдийн засагтай улсыг удирдах болсон нь түүхэн үйл явдалд тооцогдож байна.
2012 онд Мелонигийн санаачилгаар байгуулсан Италийн ахан дүүс намыг Нео-Фашист үзэлтэй ч гэж үздэг байна.
Италийн Засгийн газрын есөн яамыг Мелонигийн нам удирдах бол үлдсэн таван яамыг өмнөх ерөнхий сайд Силвио Берлусконигийн "Форца Италиа" нам, Маттео Салвинигийн "Лиг нам" хуваан удирдах аж.
Салвини, Берлускони нар нь удаан хугацааны туршид ОХУ-ын Ерөнхийлөгч Владимир Путины талд байсан удирдагчид бол Мелони Украины талд тууштай зогсдог. Энэ зөрчил Засгийн газрын ажилд саад болж магадгүйг судлаачид онцолж байна.
