УИХ-ын халдашгүй байдлын дэд хорооны хуралдаанаас гарч ирсэн гишүүн Г.Амартүвшин сэтгүүлчдийн сонирхосон асуулатд хариуллаа. УИХ-ын гишүүн Г.Амартүвшинг Хөгжлийн Банкны гүйцэтгэх захирлаар ажиллаж байхдаа аж ахуйн нэгжид давуу байдал олгосон гэдэг үндэслэлээр АТГ-аас яллагдагчаар татсан байна.
Тэрбээр "Намайг шалгаж байгаа үндэслэл нь "Вертэкс майнинг" гэдэг компанид давуу байдал олгосон, улсад онц их хэмжээний буюу 33 тэрбум төгрөгийн хохирол учруулсан гэж үзэж байгаа юм байна. Гэтэл тэр 33 тэрбумын зээл нь өнөөдөр 16 тэрбумын үлдэгдэлтэй, 9.6 тэрбум төгрөгийн зээлийн хүү төлсөн байна. Дээрээс нь анх тавьсан барьцаа хөрөнгө нь хэвээр байгаа. Тэгэхээр яг ямар хохирол учруулсан нь тодорхой биш.
Дээрээс нь Хөгжлийн Банкны тухайд гүйцэтгэх захирал нь дангаараа ямар нэгэн зээлийн шийдвэр гаргадаггүй. Нийт 16-17 хүн шийдвэр гаргалтад оролцдог. Мөн ТУЗ-ийн шийдвэр гарсан тохиолдолд гүйцэтгэх захирал биелүүлэх үүрэгтэй" хэмээв. Г.Амартүвшин 2019 оны тавдугаар сард Хөгжлийн банкны гүйцэтгэх захирлаар томилогдсон аж.
