Шүгэл үлээгчийн эрх зүйн байдлын тухай хуулийн төсөл болон хамт өргөн мэдүүлсэн хуулийн төслүүд хэлэлцэх эсэх асуудлыг хэлэлцэж байна. Энэ хүрээнд гишүүд асуулт асууж, хариулт авч, өөрсдийн саналаа хэлж байна.
Хууль зүй, дотоод хэргийн сайд Х.Нямбаатар “Манай улсад мөрдөн шалган ажиллагаа хэдэн жил ч үргэлжилж болдог. Эсвэл шүүх дээр очоод замхардаг. Сүүлийн 10 жилийн хугацаанд гадна дотнын хөрөнгө оруулагчдыг дээрэмдэж тоносон бүх эрүүгийн хэргүүдийн талаар мэдээллийг олон нийтэд хүргэнэ. Энэ хэрэгт хэн, яаж ажилласан талаар мэдээллийг олон нийтэд ил болгоно. Цаашид эрүүгийн хэрэг шийдвэрлэх хуулиа боловсронгуй болгож богино хугацаанд хэргийг шийдвэрлэдэг, гэм буруутай бол буруутайг нь нотолдог, хүнийг хэлмэгдүүлдэггүй тодорхой шуурхай байх зарчмыг хангасан өөрчлөлтийг оруулж ирэхээр ажиллаж байна. Энэ хуульд дээр төрийн албан тушаалтан авлига, ашиг сонирхлын талаар олж авсан мэдээллээр шүгэл үлээхэд төрийн болон албаны нууц байгууллагын болон хувь хүний нууцын мэдээллийг хамгаалах, хууль тогтоомжийн хязгаарлалт хамаарахгүй, нууцыг задруулсан гэж хуулийн хариуцлага хүлээлгэхгүй гэж хуульчилж өгсөн. Хамгаалалтын хувьд гэрч хохирогчийн хамгаалах хөтөлбөрт хамруулахаас гадна энэ хуульд заасан болон эрүүгийн болон зөрчлийн хуулиар шүгэл үлээгчдийн эрх зүйн байдлыг хамгаалж өгнө гэж тусгасан. Шүгэл үлээгчдэд бас тодорхой зүйлийг хориглож байгаа. Мөрдөн шалгах ажиллагааны нууцыг задруулж болохгүй, өөрт болон өөрийн хамаарал бүхий этгээдүүддээ шүгэл үлээснийхээ төлөө давуу байдал бий болгож болохгүй гэсэн зохицуулалтуудыг оруулсан” гэв.
Г.Бүжинлхам
