Засгийн газрын хуралдаан үргэлжилж байна. Уг хуралдаанаас гарсан шийдвэрийн талаар Хүнс, хөдөө аж ахуй хөнгөн үйлдвэрийн сайд З.Мэндсайхан сэтгүүлчдэд мэдээлэл хийлээ.
Тэрбээр "Засгийн газраас хоёр шийдвэр гаргалаа. Гурил үйлдвэрлэгч болон мах нийлүүлэгч аж ахуйн нэгжүүдэд 3 хувийн хүүтэй 230 тэрбум төгрөгийн зээлийн эх үүсвэрийг олгохоор боллоо. Ингэснээр иргэдэд ирэх мах болон гурилын үнийн дарамтыг бууруулах юм. Уг зээлийг авах хүсэлтэй аж ахуйн нэгж арилжааны банканд хандах аж. Арилжааны банк зээл олгосон тохиолдолд аж ахуйн нэгж 3 хувийн хүүг төлж, зөрүүг Засгийн газар өгөх аж. Энэ нь "Эдийн засгаа сэргээж, эрүүл мэндээ хамгаалах 10 их наядын цогц төлөвлөгөө"-тэй ижил журам юм.
Мөн төв, суурин газрын иргэдэд зориулан энэ жил 12.7 тонн нөөцийн мах бэлдсэн. Үүнээс 30 хувь нь үхрийн мах, 70 хувь нь хонь, ямааны мах байгаа. Хонины махыг 8300 төгрөгөөр борлуулж байна. Засгийн газраас нөөцийн маханд 350 төгрөгийн хөнгөлөлт үзүүлэхээр шийдвэрлэлээ. Мах борлуулагч аж ахуйн нэгжүүд ирэх амралтын өдрүүдэд гулуузаар нь гаргаж худалдаална. Энэ үеэр нэг килограмм нь 7750 төгрөг болж хямдарна" гэв.
