Засгийн газар төсвийн тодотголоо УИХ-аар хэлэлцүүлж байна. Төсвийн тодотголтой хамт Төрийн хэмнэлтийн тухай хуулийн төслийг УИХ-д өргөн мэдүүлсэн. УИХ болон Засгийн газрын харьяа агентлагууд, төрийн өмчит үйлдвэрийн газрууд дэд дарга, орлогч даргатай байхыг хориглох, нийслэлийн Засаг дарга хоёр хүртэл, аймаг, дүүрэг, сумын Засаг дарга нэгээс илүү орлогч даргатай байхыг хориглох заалт Төрийн хэмнэлтийн тухай хуульд багтсан юм. Ингэснээр хэдэн хүн ажлаасаа чөлөөлөгдөх талаар Сангийн яамны төрийн нарийн бичгийн дарга Ж.Ганбат хэлэхдээ "Агентлагууд дэд даргагүй ажиллах болсноор орон тоо нь 37-гоор буурна. Аймаг, нийслэлийн Засаг даргын Тамгын газар дээр 21, сум, дүүргийн тамгын газар дээр 22, нийт 80 хүнээр орон тоо буурна. Үүнээс гадна автомашины хэрэглээтэй холбоотойгоор 5562 жолоочийн асуудал үүсэж байгаа. Засгийн газар энэ жолооч нарыг ажлын байраар хангах асуудлыг ярьж байна. Хувийн хэвшилтэй хамтраад ажлын байраар хангана" гэлээ.
